Har bir yulduzning konserti oddiygina qo‘shiq kuylashdan iborat emas. Bu katta shou bo‘lib, unda maxsus effektlar, chiroyli dekoratsiyalar va ko‘zga tashlanadigan kiyimlar bo‘ladi. Ba’zida bunday konsertlarga sarflangan pul o‘rtacha kino byudjetidan ham ko‘proq bo‘ladi. Ularning sahnadagi ko‘rinishi esa tomoshabinlarda o‘zgacha taassurot qoldiradi. Quyida millionlab dollar sarflangan, katta shoulari bilan mashhur bo‘lgan 4 taniqli artist haqida so‘z boradi.
Beyonse va Renaissance shousi
Agar Beyonse mukammal va katta shou tayyorlamoqchi bo‘lsa, sarf-xarajatlar uchun pul tejamaydi. Amerika va Yevropada o‘tkazilgan 56 konsertdan iborat eng mashhur jahon gastrol turi — Renaissance’ga tayyorgarlik Beyonse va uning jamoasiga 4 yil vaqt oldi. Bu vaqt ichida shouni tashkil etishga 24 million dollar sarflangan.
Ushbu mablag‘lar tomoshabinlarni hayratda qoldirish uchun sarflandi: LED ekranlar, harakatlanuvchi platformalar, hayratomuz bezaklar — masalan, Beyonse minib chiqqan yaltirab turgan ot, robotlar, harbiy texnika va boshqalar.
Yulduzning kostyumlariga ham katta mablag‘ ajratilgan. Gastrol uchun dunyo bo‘ylab mashhur dizaynerlar tomonidan 148 ta libos tayyorlangan. Har bir kostyum narxi 2000 dollardan 100 000 dollargacha bo‘lgan.
Bugungi kunga kelib, Beyonsening Renaissance shousi tarixdagi eng daromadli ayol gastrol turi deb tan olingan. Umumiy tushum 579 million dollarni tashkil qilgan.
Keti Perri Las Vegasdagi shousi
Keti Perrining PLAY nomli konsert rezidensiyasi 2021-yildan 2023-yilgacha Las Vegasdagi Resorts World Theatre kazino-mehmonxonasida bo‘lib o‘tdi. Bu vaqt mobaynida qo‘shiqchi 54 ta konsert berdi. Keti o‘zini turli joylarda sinovdan o‘tayotgan qo‘g‘irchoq obrazida namoyon etdi.
Ko‘p mablag‘ animatsion rekvizitlarga sarflandi: sehrli qo‘ziqorinlar, ot, rezina o‘rdakchalar, pandemiya davriga xos niqob, katta hajmdagi hojatxona qog‘ozlari va, albatta, Keti sahnaga chiqadigan gigant hojatxona.
Aytgandek, bu shou tanqidchilar tomonidan turlicha baholandi. Ayrimlar uni g‘oyasi va sahna bezaklari uchun maqtashgan bo‘lsa, ba’zilar hojatxona sahnasi katta yoshli qo‘shiqchiga to‘g‘ri kelmasligini ta’kidladi.
Riannaning million dollarlik shousi
2023-yilda Rianna Super Bowl’da sahnaga chiqdi. Beyonse yoki Keti Perri shoularidan farqli o‘laroq, u sahnada na rekvizit, na yuzlab dizayner liboslari bilan chiqdi. Hatto uning “konserti” atigi 13 daqiqa davom etdi. Shunga qaramay, bu qisqa chiqish millionlab dollarga tushdi. Barcha xarajatlarni milliy futbol ligasi (NFL) qoplagan.
Minimalistik ko‘rinishiga qaramay, 13 daqiqalik bu chiqishning narxi turli manbalarga ko‘ra 8 milliondan 13 million dollargacha bo‘lgan. Mablag‘lar asosan havoda osilib turgan detallarga sarflandi. Rianna sahna markazida kuyladi, raqqoslar esa yon tomonlarida harakatlandi. Shuningdek, chiqish yakunidagi yong‘in ham xarajatlar ro‘yxatida edi.
Qiziq tomoni — Rianna bu mini-konsert uchun bir tiyin ham gonorar olmagan. Super Bowl’ning an’anasiga ko‘ra, bosh sahna san’atkorlariga to‘lov qilinmaydi. Biroq Rianna o‘z vaqtini juda samarali ishlatdi. Qo‘shiqlar orasidagi bir necha soniyalik pauzada u o‘zining go‘zallik brendiga oid pudrani surtib, reklama qildi va keyinchalik ushbu mahsulot savdosidan millionlab daromad topdi.
The Weeknd va tomoshabinlar uchun sarflangan millionlar
Super Bowl sahnasida chiqish qilgan yana bir san’atkor bu The Weeknd. U 2021-yilda futbol bo‘yicha final o‘yinida sahnaga chiqqan. Rianna holatida bo‘lgani kabi, barcha xarajatlarni Super Bowl tashkilotchilari qoplagan. Ammo ularning byudjeti cheklangan edi. The Weeknd esa o‘zi istaganidek shou qilishni xohladi — faqat ajratilgan pul evaziga emas. Natijada u o‘z mablag‘idan 7 million dollar qo‘shdi.
Bu sarmoya o‘zini to‘liq oqladi. Uning chiqishi Super Bowl tarixidagi eng tomoshabop va hayratomuz chiqish sifatida e’tirof etildi. Sahna shahar manzarasi uslubida bezatildi.
Xonandaning sahnada kiygan pidjagi ham arzon bo‘lmagan. Mashhur Givenchy modalar uyi pidjakni ushbu shou uchun maxsus tayyorlagan. Pidjak minglab kristallar bilan bezatilgan bo‘lib, uni tikish 10 kundan ko‘proq vaqt olgan.
Rianna singari, The Weeknd ham 13–14 daqiqa davomida chiqish qilgan. Bu uning mashhur hitlaridan tuzilgan musiqiy mikstura bo‘lgan. U ham bu shou uchun gonorar olmagan.
Zamonaviy shou-biznes bu millionlab sarmoya talab qiladigan soha. Shou qanchalik yirik bo‘lsa, u shunchalik ko‘p kuch va resursni talab qiladi.
Izoh (0)