Turkiya prezidenti Rajab Toyyib Erdog‘on Anqarada BMTning falastinlik qochqinlar bo‘yicha agentligi (UNRWA) ofisi ochilishini e’lon qildi. Bu haqda Al Jazeera xabar berdi.
Turkiya prezidenti Istanbulda bo‘lib o‘tgan Islom hamkorlik tashkiloti yig‘ilishida so‘zga chiqdi. Unda prezident Isroilning UNRWA’ni taqiqlash to‘g‘risidagi qaroridan so‘ng tashkilotga a’zo davlatlarni ko‘proq yordam ko‘rsatishga chaqirgan.
“Biz falastinlik qochqinlarga g‘amxo‘rlik qilish nuqtai nazaridan beqiyos rol o‘ynaydigan UNRWA’ning Isroil tomonidan yo‘q qilinishiga yo‘l qo‘ymasligimiz kerak. Har bir a’zo davlat Isroilning o‘yinlarini barbod qilish uchun agentlikka moliyaviy va ma’naviy yordam ko‘rsatishi kerak”, dedi Erdog‘on.
Prezident, shuningdek, idoraning ochilishi Turkiyaning agentlikni qo‘llab-quvvatlashini yanada mustahkamlashini ta’kidlagan. Mamlakat UNRWA’ga 2023—2025-yillar oralig‘ida yiliga 10 million dollar ajratgan edi. 2024-yilda Turkiya agentlikni 2 million dollar bilan ta’minlagan bo‘lsa, AFAD ofatlarni boshqarish organidan yana 3 million dollar xayriya qilgandi.
Izoh (0)