Mashhurlar nafaqat sahna yoki ekran qarshisida, balki birgalikdagi sa’y-harakatlari bilan daromadni ikki, hattoki uch baravar oshiradi. Kino, moda, musiqiy san’at — bu yulduzli oilalarning yagona harakat maydoni emas. Ular oilaviy brendga aylangan, farzandlari esa ota-onasining izidan yuribgina qolmay, o‘z yo‘lini ham yaratmoqda. Ro‘yxatdagi mashhur oilalar qanday pul ishlashadi va ularning farzandlari qanday yutuqlarga erishgan? Bularning barchasini maqolada bilib olasiz.
Koppola
Koppola familiyasi kino sanoatida sifat belgisi hisoblanadi. Frensis Ford Koppola tomoshabinlarga “Cho‘qintirgan ota”, “Drakula”, “Apokalipsis” kabi afsonaviy filmlarni tuhfa etgan.
Qiziq tomoni shundaki, u ko‘pincha o‘z yaqinlarini ham filmlariga jalb qilgan.
Frensining opasi Taliya Shayr “Cho‘qintirgan ota” filmida Konni Korleone obrazini mahorat bilan gavdalantirgan va ushbu roli uchun “Oskar” mukofotiga nomzod bo‘lgan. Qiziq tomoni, Frensis dastlab uni bu rolga olishni istamagan, biroq Taliya kastingda shunchalik tabiiy harakat qilgan ediki, rejissyorda boshqa tanlov qolmagan.
Koppola oilasining keyingi avlodi ham kino tarixida o‘z izini qoldirgan. Frensining qizi Sofiya Koppola 2004-yilda “Tarjima mashaqqatlari” filmi bilan “Oskar” mukofotini qo‘lga kiritgan. 2017-yilda esa “Halokatli vasvasa” filmi uchun Kann kinofestivalida “Eng yaxshi rejissyor” deb e’tirof etilgan.
Bu oilada deyarli har bir kishi o‘z iste’dodini namoyon qilgan, lekin biz faqat Nikolas Keyjni eslaymiz. U Koppola familiyasidan voz kechib, Keyja taxallusini olgan va mustaqil ravishda muvaffaqiyatga erishgan. 1996-yilda “Las Vegasni tark etish” filmi uchun eng yaxshi erkak roli bo‘yicha “Oskar”ni qo‘lga kiritgan.
Smitlar
Uill Smit deyarli hamma sohada iqtidorli. Ko‘pchilik uning aktyorligidan oldin musiqiy faoliyati haqida unutgan. U hatto 2018-yil futbol bo‘yicha jahon chempionatining rasmiy madhiyasini kuylagan. Bundan tashqari, o‘z guruhiga ega bo‘lgan va hozir uni yana jonlantirmoqchi.
Uill — ikki karra “Oskar” nomzodi bo‘lgan aktyor.
U ikkinchi rafiqasi Jada Pinkett Smit bilan nafaqat oila, balki iste’dodlar ustaxonasini yaratdi. Ularning ikki farzandi — Uillou va Jeyden dunyoga tanilgan. Jeyden bolaligida “Baxt ortidan quvib” filmida ishtirok etgan va hozirda 20 dan ortiq rolda o‘ynagan. Ammo hozir u ko‘proq repga e’tibor qaratmoqda.
Uillou ham o‘z hayotini musiqa bilan bog‘ladi, uning qo‘shiqlari hip-hop va R’n’B uslublariga tegishli. Ijodi shunchalik yaxshi ekanki, hatto shaxsan Jay-Z yosh qo‘shiqchining prodyuseriga aylangan.
Bundan tashqari, Uillouning boshqa faoliyati ham bor, jumladan, modellik, uni Karl Lagerfeld shaxsan qo‘llab-quvvatlagan.
Bekhemlar
Bu familiya — haqiqiy reklama brendi. Ular teggan har qanday narsa foyda keltirgandek tuyuladi.
Viktoriya Spice Girls guruhidagi muvaffaqiyatli karyerasidan so‘ng dizaynerlikka o‘tgan. Hozir uning brendi Britaniya qirollik oilasi a’zolari tomonidan ham kiyiladi.
Devid esa futbolchilik faoliyatini tugatgach, ko‘plab brendlar bilan hamkorlik qilib, reklamalarda suratga tushishda davom etmoqda. Ularning oilaviy biznesi 500 million dollardan ziyodga baholanmoqda.
Farzandlari ham mustaqil daromad topishni boshlagan. Bruklin fotografiya bilan shug‘ullangan, Burberry uchun reklama kompaniyasini suratga olgan. Hozir u milliarderning qizi Nikola Peltsga uylangan va vaqtining ko‘p qismini unga bag‘ishlamoqda.
Romeo tennis bilan shug‘ullanmoqda, Kruz esa qo‘shiq kuylaydi va bu yo‘lda ancha muvaffaqiyatga erishgan. 13 yoshli Harper esa onasining izidan borib, moda sohasiga kirishga bel bog‘lagan — hattoki o‘z biznesini ochmoqchi.
Jay-Z va Beyonse
Bu oila — yana bir ajoyib hamkorlik namunasi. Ular bir-birini chin dildan sevadi. Beyonse uzoq vaqt homilador bo‘lolmagan, hattoki EKU yordamida ham. Shunda ular bola asrab olish haqida o‘ylashgan, biroq kutilmaganda juftlik farzandli bo‘lgan — hatto egizaklar tug‘ilgan.
Endi biznesga qaytsak: Jay-Z — eng muvaffaqiyatli prodyuser va ijrochilardan biri. Beyonse esa pop musiqasida yuksak cho‘qqiga chiqqan. U birinchi bo‘lib vizual albom chiqargan, o‘z saytini ochgan va shaxsiy fotosuratlarini jurnal orqali emas, o‘zi bo‘lishadi.
U nafaqat klip, balki minifilm ham yaratadi va pullik obuna orqali taqdim etadi. Shuningdek, o‘zining IvyPark sport kiyimlarini ishlab chiqaradi.
Jay-Z esa Uber aksiyalaridan daromad oladi, Tidal nomli musiqiy striming xizmatiga egalik qiladi — bu Apple Music’ka raqobatchi.
Forbes ma’lumotlariga ko‘ra, bu oilaning umumiy boyligi 1,16 milliard dollar atrofida.
Ularning qizi Blu Ayvi hozircha ishlamaydi, lekin yaqin orada faoliyat boshlashi mumkin. Hozircha u ota-onasi bilan yirik tadbirlarda muntazam ko‘rinib turadi.
Hadidlar
Hadidlar oilasida hozir eng mashhurlari — Bella va Jiji. Ammo doim ham shunday bo‘lmagan.
Ularning onasi Yolanda ham model sifatida yomon karyera qilmagan. Lekin 31 yoshida oilaga vaqt ajratish uchun sahnani tark etgan. U mashhur arxitektor va mehmonxonalar tarmog‘i egasi Muhammad Hadidga turmushga chiqqan.
Yolanda bugungi kunda farzandlariga maslahat beruvchi va yo‘lboshchi bo‘lib kelmoqda.
Izoh (0)