Isroi mudofaa vaziri Isroil Kats 19-iyun kungi hujumlardan keyin Eron oliy rahnamosi Oyatulloh Ali Xomanaiyni “zamonaviy Gitler” deb atadi. Bu haqda The Times of Israel xabar berdi.
Katsning so‘zlariga ko‘ra, Xomanaiy “bundan keyin mavjud bo‘la olmaydi”, Isroil operatsiyasiga ko‘ra u yo‘q qilinishi lozim.
Urushning maqsadi — yadroviy tahdidni bartaraf etish, vayronagarchilik manbalarini yo‘q qilish va raketa tahdidlarini zararsizlantirish. Shu doirada Isroil mudofaa armiyasi ko‘rsatma oldi va barcha maqsadlarga erishish uchun bu shaxs (Xomanaiy nazarda tutilmoqda), shubhasiz, endi mavjud bo‘lmasligi lozimligini biladi, degan Kats.
Isroil vaziri ta’kidlashicha, “yahudiy davlatini yo‘q qilishni rejalashtirgan” Xomanaiyning maqsadini amalga oshirishiga yo‘l qo‘yib bo‘lmaydi.
Agar fashistlar Germaniyasi tomonidan uyushtirilgan Holokost davrida Isroil armiyasi Gitler yashiringan bunkergacha yetib bora olganida, uni tortib chiqarib, yo‘q qilgan bo‘lardik. Men hozirgi vaziyatni shunday ko‘ryapman: Xomanaiy — bu zamonaviy Gitler, degan u.
Siyosatchi Eron oliy rahnamosi o‘z mamlakatida katta mafkuraviy ta’sirga ega ekani, u Isroilning yo‘q qilinishini ochiqchasiga qo‘llab-quvvatlayotganini bildirdi.
Buning uchun bor imkoniyatlarni, hatto o‘z xalqi hisobidan bo‘lsa ham, safarbar etmoqda. Biz uning shaxsan o‘zi kasalxonalar va turar joy binolarini o‘qqa tutishga buyruq berganiga guvoh bo‘lmoqdamiz. Bu hujumlar (gap 19-iyun kuni Eronning Beer Shevadagi “Soroka” kasalxonasiga raketa hujumi haqida ketmoqda) statistik og‘ish emas — u buni Isroil davlatini yo‘q qilish missiyasining bir qismi sifatida ko‘radi, degan Kats.
Ma’lumot o‘rnida, Isroil armiyasi bir necha bor G‘azo sektoridagi shifoxonalarni nishonga olib, bu hujumlarni HAMAS jangarilarining tibbiyot muassasalaridan harbiy maqsadlarda foydalanayotganiga asoslab oqlagan.
Xususan, Ash-Shifa, Indoneziya va Quds shifoxonalari atrofida yuz bergan havo hujumlari va quruqlikdagi reydlar katta talafotlarga olib kelgan. Tinch aholi orasida qurbonlar qayd etilgan. BMT va inson huquqlari tashkilotlari bu harakatlarni keskin tanqid qilib, tinch aholi va tibbiyot xodimlarining hayoti xavf ostida qolayotganini ta’kidlagan.
Izoh (0)