“Ipak va ziravorlar” xalqaro festivali yillar davomida nafaqat Buxoro, balki O‘zbekiston madaniy hayotida muhim voqeaga aylandi. Avvaliga mahalliy darajada boshlangan, so‘ng xalqaro maydonga chiqib, bugungi kunda turizm brendiga aylangan ushbu festival tarixiy shahar Buxoro ruhini to‘laqonli namoyon etadi.
Joriy yilning 6–8 iyun kunlari bo‘lib o‘tgan XXI “Ipak va ziravorlar” festivali Turizm qo‘mitasi, Buxoro viloyati va shahri hokimliklari, “Hunarmand” uyushmasi va boshqa tashkilotlar hamkorligida tashkil etildi. Bu yilgi tadbir nafaqat an’anaviy ruhda, balki yanada zamonaviy formatda, tashkil etildi.
XXI bor tashkil etilgan “Ipak va ziravorlar” xalqaro festivali o‘zining ko‘lami, mazmuni va tashkilotchilik darajasi bilan o‘tgan yillaridagi festivallardan ajralib turdi. Avvalgi yillarda ishtirokchilar soni bir necha o‘nlar bilan cheklangan bo‘lsa, bu yilgi tadbirda 10 ga yaqin xorijiy mamlakatdan 50 nafardan ziyod, shuningdek, O‘zbekistonning barcha hududlaridan 350 nafardan ortiq hunarmandlar ishtirok etdi. Bu — festivalning yuksalayotgan nufuzi, unga bo‘lgan qiziqish va ishonchning yorqin ifodasidir.
Festival arafasida jurnalistlar uchun tashkil etilgan matbuot anjumanida tadbir dasturi, maqsad va rejalar haqida atroflicha ma’lumot berildi. Bu esa OAV va jamoatchilik o‘rtasida to‘g‘ridan-to‘g‘ri muloqotni ta’minlab, ochiqlik va shaffoflik tamoyillariga xizmat qildi.
“Ark” qo‘rg‘onidan boshlangan festival “Labi Hovuz”gacha bo‘lgan tantanali yurish bilan ochildi. Har yili ushbu yurish Buxoro ko‘chalarini naqsh va nafosatga to‘ldiradi, lekin bu yilgi sayr ko‘lami va undagi ishtiroqchilar soni bilan alohida ahamiyat kasb etdi.
Tadbir dasturidan o‘rin olgan milliy va xalqaro ko‘rgazmalar, mahorat darslari, amaliy san’at ko‘rgazmalari, folklor ansambllar chiqishlari, milliy sport o‘yinlari va taxt ko‘rgazmalari hunarmandlar uchun tajriba almashish, mahsulotlarini keng jamoatchilikka taqdim etish hamda yangi bozorlarga yo‘l ochish imkonini berdi.
Festival doirasidagi yana bir muhim va e’tiborli tadbir — «Silk & Spices Fashion Days» modalar namoyishi bo‘ldi. Unda mahalliy va xorijiy dizaynerlar tomonidan tayyorlangan, milliy ipak matolardan tikilgan zamonaviy liboslar taqdim etildi. Bu nafaqat estetik zavq uyg‘otdi, balki milliy matolarning xalqaro modadagi o‘rnini ko‘rsatdi.
Bundan tashqari festival doirasida Chor Minor atrofida o‘tkazilgan palov musobaqasi ishtirokchilar va tomoshabinlar uchun unutilmas taassurotlar qoldirib, Buxoro taom madaniyatini namoyon etdi. Har bir hudud o‘zining an’anaviy palovini tayyorlab, hakamlar va mehmonlarga taqdim etdishdi.
XXI “Ipak va ziravorlar” xalqaro festivali yana bir bor Buxoroning nafaqat milliy, balki xalqaro ahamiyatga molik madaniy markaz sifatidagi nufuzini tasdiqladi. Ushbu festival xunarmandchilik va milliy qadriyatlarni keng targ‘ib etish, mamlakatimiz turizm salohiyatini namoyon etishda strategik ahamiyatga ega tadbirlardan biriga aylanmoqda.
Bu yilgi festivalning ko‘lami va mazmun-mohiyati avvalgi festivallarga nisbatan kengroq, iloji boricha barcha jabhalarni qamrab oldi. Festival doirasida tashkil etilgan ko‘rgazmalar, mahorat darslari, dizaynerlar namoyishlari, milliy taomlar tanlovi va konsert dasturlari nafaqat mehmonlar, balki ishtirokchilarning o‘zlarida ham ijobiy taassurot qoldirdi. Bu esa festivalning ma’naviy va ijtimoiy ta’sir kuchini yanada oshirdi.
Shu o‘rinda ta’kidlash joizki, ushbu tadbir hunarmandlar uchun yangi bozorlar eshigini ochish, turizm sohasida faoliyat yurituvchi tadbirkorlar uchun esa hamkorlik aloqalarini rivojlantirish imkonini yaratdi. Xalqaro darajadagi ushbu muloqot va tajriba almashinuvi nafaqat iqtisodiy jihatdan, balki madaniy aloqalarni mustahkamlash nuqtai nazaridan ham muhim ahamiyat kasb etadi.
Festival har yili yangilanib, mazmunan boyib borayotgani uning uzluksiz rivojlanishda ekanligidan dalolat beradi. Shu bois, bu kabi tadbirlar davlat va jamiyat o‘rtasidagi ijtimoiy muloqotni mustahkamlash, milliy qadriyatlarimizni saqlash va jahon sahnasida munosib tarzda namoyon etishda muhim vosita bo‘lib xizmat qiladi.
Sheriklik huquqi asosida
Izoh (0)