Qozog‘iston CryptoCity innovatsion pilot hududi tashkil etilishini e’lon qildi. Unda kriptovalyutalar tovarlar, xizmatlar sotib olish va boshqa maqsadlarda ishlatiladi. Bu haqda Qozog‘iston prezidenti Qosim-Jo‘mart To‘qayev Ostonada o‘tkazilayotgan xalqaro forumda ma’lum qilgan.
“Biz global noaniqlik davrida yashamoqdamiz. Bu lahzani chorraha, dunyo ishlaridagi burilish nuqtasi deb atash mumkin. Ammo bunday ta’riflarni tarixchilarga qoldiraylik. Hozir bizning javobimiz qanday bo‘lishi muhimroq. Biz tanlov qilishimiz lozim”, deydi To‘qayev.
Prezident Qozog‘istonning raqamli transformatsiyada sezilarli yutuqlarga erishganini, bu esa mamlakatning Yevrosiyo IT markaziga aylanish istagini aks ettirishini ta’kidlagan.
“Biz kriptovalyutalardan tovarlar, xizmatlar sotib olish va boshqa maqsadlarda foydalanish mumkin bo‘lgan innovatsion CryptoCity pilot hududini yaratishni rejalashtirmoqdamiz. Biz raqamli transformatsiyada sezilarli yutuqlarga erishdik, bu Yevrosiyo IT markaziga aylanish istagimizni aks ettiradi.
Sun’iy intellektga alohida e’tibor qaratmoqdamiz. Maqsadimiz — bir qator xorijiy universitetlar filiallari faoliyat yuritadigan, ilmiy-tadqiqot va ishlanmalar sohasida hamkorlik yo‘lga qo‘yilgan akademik va innovatsion markazga aylanish”, dedi Qozog‘iston prezidenti.
Shuningdek, Qozog‘iston rahbari Markaziy Osiyodagi eng qudratli superkompyuter ishga tushirilgani va allaqachon mamlakatga olib kelinganini ma’lum qildi.
“Birinchi navbatdagi vazifa — mintaqaviy nomutanosibliklarni kamaytirish va o‘rta sinfni mustahkamlashdir. Aynan shu sababli raqamli texnologiyalar va sun’iy intellektdan tortib toza energiya va yuqori qo‘shilgan qiymatli ishlab chiqarishlargacha bo‘lgan asosiy sohalarda salohiyatimizni mustahkamlashda davom etmoqdamiz”, deya ta’kidladi To‘qayev.
Qozog‘iston Raqamli rivojlanish, innovatsiyalar va aerokosmik sanoati vaziri Jaslan Madiyev CryptoCity’ni yaratish rejalariga izoh berar ekan, respublikada sinov kripto hududini joylashtirish uchun bir nechta potensial joylar mavjudligini ta’kidlagan.
Uning so‘zlariga ko‘ra, bu Aloqau aqlli shahri, Borovoye kurorti yoki Ostonadagi EXPO hududi bo‘lishi mumkin.
Izoh (0)