Qozog‘istonda artilleriya tizimlari uchun o‘q-dorilar ishlab chiqaruvchi yangi sanoat korxonasining qurilishi boshlandi. Loyiha Singapur kompaniyasi bilan hamkorlikda amalga oshirilmoqda.
Korxonada 122 mm, 152 mm va 155 mm kalibrli artilleriya snaryadlari ishlab chiqariladi. U mamlakat ichki mudofaa ehtiyojlarini qondirish bilan birga, eksportga ham xizmat qilishi rejalashtirilgan. Qurilish ishlari uchun milliy sanoat parklaridan birida maxsus hudud tanlab olingan. Biroq aniq joylashuv hozircha oshkor etilmadi.
Xabar qilinishicha, ayni paytda geologik izlanishlar boshlab yuborilgan. Mutaxassislar tanlangan hududning qurilish uchun yaroqliligini baholash va sanoat miqyosidagi faoliyatga tayyorlash kabi vazifalar bilan shug‘ullanmoqda.
Mazkur loyiha Qozog‘istonning ichki harbiy-sanoat bazasini kengaytirish va xorijiy yetkazib beruvchilarga qaramlikni kamaytirishga qaratilgan keng qamrovli strategiyasining bir qismi hisoblanadi. Bu, ayniqsa, geosiyosiy beqarorlik va global ta’minot zanjirlaridagi o‘zgarishlar fonida dolzarb ahamiyat kasb etmoqda.
155 mm kalibrli snaryadlar ishlab chiqarish rejasi mamlakat NATO standartlariga moslashish uchun harakat qilayotganini bildiradi. Postsovet mintaqasida keng qo‘llanadigan 122 mm va 152 mm o‘q-dorilar esa asosan ichki ehtiyojlarni qondirishga xizmat qiladi.
Izoh (0)