Yakkasaroy tumani fuqarolarining barcha ma’lumotlari 4 yildan beri ochiq manbalarda saqlanmoqda. Bu haqda “Kurbanoff.net” Telegram kanali ma’lumot berdi.
“Daryo” Github saytidagi ma’lumotlarni o‘rgandi. Haqiqatdan ham ushbu saytda marvel2002 nomli profil egasi tomonidan Yakkasaroy tumanida yashovchi barcha voyaga yetgan fuqarolarning ism-sharifi, manzili va suratlari joylangani aniqlandi.
“Kurbanoff.net” Telegram kanali muallifi ushbu ma’lumotlar 2021-yildagi saylovlar davrida talaba tomonidan yaratilgan Telegram bot orqali “sizdirilgani”ni aytmoqda.
Saytda 4 yildan beri saqlanayotgan faylda 100 mingdan ortiq Yakkasaroy tumani fuqarolarining shaxsga doir barcha ma’lumotlari mavjud.
Bir emas 100 minglab fuqarolarning shaxsga doir ma’lumotlaridan tashqari, saylov uchastkalari, ya’ni davlat obyektlarining barcha suratlari ham tarqalgan.
“Mana shunday yashaymiz — keyin yana hayron bo‘lamiz: firibgarlar biz bilan yashaydigan odamlarning ma’lumotlarini qayerdan biladi? Ular qariyalarga qo‘ng‘iroq qilib, qarindoshlari baxtsiz hodisaga uchragan deb qo‘rqitadi.
Shu bilan birga, “ma’lumotlar serverlari chet elda bo‘lishi mumkin emas”, deb taqiqlaymiz — go‘yoki ma’lumotlar sizib chiqadi. Asl sizib chiqish esa mana — har kungi hayotimizda. Bizning shaxsiy ma’lumotlarimiz hammaning qo‘lida: maktab o‘qituvchilaridan tortib, poliklinikadagi hamshiragacha”, deydi “Kurbanoff.net” kanali muallifi.
“Shaxsga doir ma’lumotlar to‘g‘risida”gi O‘zbekiston Respublikasi qonuniga ko‘ra, davlat shaxsga doir ma’lumotlarning himoya qilinishini kafolatlaydi.
Subyektning roziligisiz yoki boshqa qonuniy asos mavjud bo‘lmagan holda shaxsga doir ma’lumotlarni oshkor etish va tarqatishga yo‘l qo‘yilmaydi.
Bu “Daryo” va faollar aniqlagan birgina holat. Ammo bunday ochiq manbada saqlanayotgan va fuqarolarning xavfsizligiga tahdid solishi mumkin bo‘lgan ma’lumotlar bazasi boshqa joylarda ham bo‘lishi mumkin. Mutasaddilardan ushbu holatga izoh berishlarini kutib qolamiz.
Izoh (0)