Яккасарой тумани фуқароларининг барча маълумотлари 4 йилдан бери очиқ манбаларда сақланмоқда. Бу ҳақда “Kurbanoff.net” Telegram канали маълумот берди.
“Дарё” Github сайтидаги маълумотларни ўрганди. Ҳақиқатдан ҳам ушбу сайтда марвел2002 номли профил эгаси томонидан Яккасарой туманида яшовчи барча вояга етган фуқароларнинг исм-шарифи, манзили ва суратлари жойлангани аниқланди.
“Kurbanoff.net” Telegram канали муаллифи ушбу маълумотлар 2021 йилдаги сайловлар даврида талаба томонидан яратилган Telegram бот орқали “сиздирилгани”ни айтмоқда.
Сайтда 4 йилдан бери сақланаётган файлда 100 мингдан ортиқ Яккасарой тумани фуқароларининг шахсга доир барча маълумотлари мавжуд.
Бир эмас 100 минглаб фуқароларнинг шахсга доир маълумотларидан ташқари, сайлов участкалари, яъни давлат объектларининг барча суратлари ҳам тарқалган.
“Мана шундай яшаймиз — кейин яна ҳайрон бўламиз: фирибгарлар биз билан яшайдиган одамларнинг маълумотларини қаердан билади? Улар қарияларга қўнғироқ қилиб, қариндошлари бахтсиз ҳодисага учраган деб қўрқитади.
Шу билан бирга, “маълумотлар серверлари чет элда бўлиши мумкин эмас”, деб тақиқлаймиз — гўёки маълумотлар сизиб чиқади. Асл сизиб чиқиш эса мана — ҳар кунги ҳаётимизда. Бизнинг шахсий маълумотларимиз ҳамманинг қўлида: мактаб ўқитувчиларидан тортиб, поликлиникадаги ҳамширагача”, дейди “Kurbanoff.net” канали муаллифи.
“Шахсга доир маълумотлар тўғрисида”ги Ўзбекистон Республикаси қонунига кўра, давлат шахсга доир маълумотларнинг ҳимоя қилинишини кафолатлайди.
Субъектнинг розилигисиз ёки бошқа қонуний асос мавжуд бўлмаган ҳолда шахсга доир маълумотларни ошкор этиш ва тарқатишга йўл қўйилмайди.
Бу “Дарё” ва фаоллар аниқлаган биргина ҳолат. Аммо бундай очиқ манбада сақланаётган ва фуқароларнинг хавфсизлигига таҳдид солиши мумкин бўлган маълумотлар базаси бошқа жойларда ҳам бўлиши мумкин. Мутасаддилардан ушбу ҳолатга изоҳ беришларини кутиб қоламиз.
Изоҳ (0)