Sirdaryo, Toshkent, Xorazm, Andijon va Farg‘ona viloyatlarida yer maydonlari bilan bog‘liq noqonuniy holatlar aniqlandi.
Sirdaryo viloyatining Sardoba tumani hokimligi mas’ul xodimi bog‘dorchilikka ixtisoslashgan fermer xo‘jalikning 15 gektar yer maydonini 3 yil muddatga ijaraga berish uchun 360 million so‘m talab qilib, shuningdek, o‘z mansab mavqeyidan foydalanib mazkur yer maydonining toifasini kovrak o‘simligini ekishga o‘zgartirish bo‘yicha tuman hokimining qarorini chiqartirib berish evaziga fuqarodan 30 ming AQSH dollari olgan vaqtida ushlandi.
Toshkent shahridagi banklardan birining Kredit operatsiyalari va axborot almashinuvi bo‘limi boshlig‘i hamda Biznes mijozlarini kreditlash bo‘limi boshlig‘i, shuningdek, 1992 va 1999-yillarda tug‘ilgan ikki nafar fuqaro o‘zaro kelishgan holda, O‘rta Chirchiq tumani hokimligi tomonidan mahalliy MCHJlardan biriga bog‘dorchilik bilan shug‘ullanish maqsadida ajratib berilgan 5,99 gektar yer maydonini xaridorga 455 ming AQSH dollariga sotishga kelishgan.
Ular avans sifatida 70 ming AQSH dollari va mazkur yer maydonining toifasini mansabdor tanishlari orqali issiqxona faoliyatiga o‘zgartirib, kadastr hujjatlarini rasmiylashtirib berish evaziga 15 ming AQSH dollari, jami 85 ming AQSH dollari olgan vaqtida ashyoviy dalillar bilan ushlandi.
Xorazm viloyati Shovot tumanida yashovchi, 1984-yilda tug‘ilgan fuqaro o‘zining 1989-yilda tug‘ilgan singlisi bilan kelishgan holda, tuman hokimligi zaxirasidagi 2500 metr kvadrat ekin yer maydonini kadastr idoralaridagi mansabdor tanishlari orqali xaridor nomiga rasmiylashtirib berish evaziga 66 ming AQSH dollari talab qilib, oldindan 45 ming AQSH dollari va 130 mln so‘m olgan vaqtida ushlandi.
Xorazm viloyati Yangibozor tumani investitsiyalar, sanoat va savdo bo‘limi mutaxassisi xizmat mavqeyidan foydalangan holda, “E-auksion” savdolariga qo‘yilgan 1 gektar yer maydonini mahalliy fuqaroga olib berish evaziga 300 million so‘m talab qilib, shundan 243 million so‘m hamda 4300 AQSH dollari olgan vaqtida ashyoviy dalillar bilan ushlandi.
Andijon shahrida yashovchi, 1986-yilda tug‘ilgan shaxs Xo‘jaobod tumani hokimligi tomonidan 2023-yilda qishloq xo‘jaligi mahsulotlari yetishtirish uchun 30 yilga ijara asosida ajratib berilgan 30 sotix yer maydonini 1987 va 1988-yillarda tug‘ilgan ikki nafar sherigi bilan kelishgan holda, 27 ming AQSH dollariga sotish, shuningdek, mansabdor tanishlari orqali yer maydonining toifasini o‘zgartirib, kelgusida qurilish ishlarini amalga oshirish huquqini beruvchi ruxsatnoma olib berish evaziga 11600 AQSH dollari talab qilib, jami 38 600 AQSH dollari olgan vaqtida ushlandi.
Farg‘ona viloyati Rishton tumanida yashovchi, 1959-yilda tug‘ilgan shaxs soxta hujjatlar asosida o‘zlashtirib olgan, tuman hokimligi zaxirasidagi bog‘dorchilikka ixtisoslashgan 26 sotix yer maydonini kadastr idoralaridagi tanishlari orqali turar joy toifasiga o‘zgartirib, xaridor nomiga rasmiylashtirib berish evaziga 26 ming AQSH dollari olgan vaqtida ushlandi.
Hozirda mazkur shaxslarga nisbatan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
So‘nggi oylarda yerni noqonuniy sotishga urinish holatlari
2025-yil aprelida Kadastr agentligi Andijon tumani bo‘limi sobiq boshlig‘i qo‘lga olingandi. U bog‘dorchilik uchun ajratilgan 1 gektar yer maydonini Kadastrlar palatasida ishlovchi tanishlari orqali turar joy sifatida toifasini o‘zgartirib, kadastr hujjatlarini rasmiylashtirib berish evaziga 10 000 dollar olgan.
Mart oyida Andijonda advokat stajyori va sherigi 34 ming dollarni noqonuniy olayotganida ushlangandi. Ular pulni 34 sotix noturar yer maydonini kadastr tizimidagi tanishlari orqali xaridor nomiga turar joy sifatida rasmiylashtirib berish evaziga olgan.
Fevralda Farg‘onada fuqaro 2,5 gektar yerni 650 ming dollarga sotishga kelishib, oldindan 100 ming dollarni olgan vaqtida ashyoviy dalillar bilan ushlangandi. Toshkent viloyati Ohangaron tumanida joylashgan va qishloq xo‘jaligiga mo‘ljallangan 32 gektar yerni 2,4 mln dollarga noqonuniy sotmoqchi bo‘lgan shaxs qo‘lga olingandi.
Surxondaryo viloyatida qishloq xo‘jaligiga mo‘ljallangan 45 sotix yerni 60 ming dollarga sotishga kelishib, 56,7 ming dollar va 43 million so‘m olgan vaqtida qo‘lga tushgandi. Xorazm viloyatining Urganch tumanida fuqaro davlat zaxirasida bo‘lgan 24 sotix yer maydonini kadastr tizimida ishlovchi tanishlari orqali xaridor nomiga rasmiylashtirib berish evaziga 45 ming dollar va 13 million so‘m olgan vaqtida ushlangandi.
Izoh (0)