Сирдарё, Тошкент, Хоразм, Андижон ва Фарғона вилоятларида ер майдонлари билан боғлиқ ноқонуний ҳолатлар аниқланди.
Сирдарё вилоятининг Сардоба тумани ҳокимлиги масъул ходими боғдорчиликка ихтисослашган фермер хўжаликнинг 15 гектар ер майдонини 3 йил муддатга ижарага бериш учун 360 миллион сўм талаб қилиб, шунингдек, ўз мансаб мавқейидан фойдаланиб мазкур ер майдонининг тоифасини коврак ўсимлигини экишга ўзгартириш бўйича туман ҳокимининг қарорини чиқартириб бериш эвазига фуқародан 30 минг АҚШ доллари олган вақтида ушланди.
Тошкент шаҳридаги банклардан бирининг Кредит операциялари ва ахборот алмашинуви бўлими бошлиғи ҳамда Бизнес мижозларини кредитлаш бўлими бошлиғи, шунингдек, 1992 ва 1999 йилларда туғилган икки нафар фуқаро ўзаро келишган ҳолда, Ўрта Чирчиқ тумани ҳокимлиги томонидан маҳаллий МЧЖлардан бирига боғдорчилик билан шуғулланиш мақсадида ажратиб берилган 5,99 гектар ер майдонини харидорга 455 минг АҚШ долларига сотишга келишган.
Улар аванс сифатида 70 минг АҚШ доллари ва мазкур ер майдонининг тоифасини мансабдор танишлари орқали иссиқхона фаолиятига ўзгартириб, кадастр ҳужжатларини расмийлаштириб бериш эвазига 15 минг АҚШ доллари, жами 85 минг АҚШ доллари олган вақтида ашёвий далиллар билан ушланди.
Хоразм вилояти Шовот туманида яшовчи, 1984 йилда туғилган фуқаро ўзининг 1989 йилда туғилган синглиси билан келишган ҳолда, туман ҳокимлиги захирасидаги 2500 метр квадрат экин ер майдонини кадастр идораларидаги мансабдор танишлари орқали харидор номига расмийлаштириб бериш эвазига 66 минг АҚШ доллари талаб қилиб, олдиндан 45 минг АҚШ доллари ва 130 млн сўм олган вақтида ушланди.
Хоразм вилояти Янгибозор тумани инвестициялар, саноат ва савдо бўлими мутахассиси хизмат мавқейидан фойдаланган ҳолда, “E-auksion” савдоларига қўйилган 1 гектар ер майдонини маҳаллий фуқарога олиб бериш эвазига 300 миллион сўм талаб қилиб, шундан 243 миллион сўм ҳамда 4300 АҚШ доллари олган вақтида ашёвий далиллар билан ушланди.
Андижон шаҳрида яшовчи, 1986 йилда туғилган шахс Хўжаобод тумани ҳокимлиги томонидан 2023 йилда қишлоқ хўжалиги маҳсулотлари етиштириш учун 30 йилга ижара асосида ажратиб берилган 30 сотих ер майдонини 1987 ва 1988 йилларда туғилган икки нафар шериги билан келишган ҳолда, 27 минг АҚШ долларига сотиш, шунингдек, мансабдор танишлари орқали ер майдонининг тоифасини ўзгартириб, келгусида қурилиш ишларини амалга ошириш ҳуқуқини берувчи рухсатнома олиб бериш эвазига 11600 АҚШ доллари талаб қилиб, жами 38 600 АҚШ доллари олган вақтида ушланди.
Фарғона вилояти Риштон туманида яшовчи, 1959 йилда туғилган шахс сохта ҳужжатлар асосида ўзлаштириб олган, туман ҳокимлиги захирасидаги боғдорчиликка ихтисослашган 26 сотих ер майдонини кадастр идораларидаги танишлари орқали турар жой тоифасига ўзгартириб, харидор номига расмийлаштириб бериш эвазига 26 минг АҚШ доллари олган вақтида ушланди.
Ҳозирда мазкур шахсларга нисбатан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.
Сўнгги ойларда ерни ноқонуний сотишга уриниш ҳолатлари
2025 йил апрелида Кадастр агентлиги Андижон тумани бўлими собиқ бошлиғи қўлга олинганди. У боғдорчилик учун ажратилган 1 гектар ер майдонини Кадастрлар палатасида ишловчи танишлари орқали турар жой сифатида тоифасини ўзгартириб, кадастр ҳужжатларини расмийлаштириб бериш эвазига 10 000 доллар олган.
Март ойида Андижонда адвокат стажёри ва шериги 34 минг долларни ноқонуний олаётганида ушланганди. Улар пулни 34 сотих нотурар ер майдонини кадастр тизимидаги танишлари орқали харидор номига турар жой сифатида расмийлаштириб бериш эвазига олган.
Февралда Фарғонада фуқаро 2,5 гектар ерни 650 минг долларга сотишга келишиб, олдиндан 100 минг долларни олган вақтида ашёвий далиллар билан ушланганди. Тошкент вилояти Оҳангарон туманида жойлашган ва қишлоқ хўжалигига мўлжалланган 32 гектар ерни 2,4 млн долларга ноқонуний сотмоқчи бўлган шахс қўлга олинганди.
Сурхондарё вилоятида қишлоқ хўжалигига мўлжалланган 45 сотих ерни 60 минг долларга сотишга келишиб, 56,7 минг доллар ва 43 миллион сўм олган вақтида қўлга тушганди. Хоразм вилоятининг Урганч туманида фуқаро давлат захирасида бўлган 24 сотих ер майдонини кадастр тизимида ишловчи танишлари орқали харидор номига расмийлаштириб бериш эвазига 45 минг доллар ва 13 миллион сўм олган вақтида ушланганди.
Изоҳ (0)