Armanistonning Yerevan shahrida o‘tayotgan xokkey bo‘yicha kattalar o‘rtasidagi Jahon chempionati IV divizionida O‘zbekiston terma jamoasi 3 ta o‘yin o‘tkazib, 2 g‘alaba va bir mag‘lubiyat qayd etdi hamda turnir jadvalida yetakchi bo‘lib oldi.
Musobaqaning birinchi turida o‘zbekistonlik xokkeychilar Kuvayt termasiga qarshi bahs olib borishdi. Uchrashuvda O‘zbekiston to‘liq ustunlikka ega bo‘lib, 13:3 hisobida yirik g‘alabani qo‘lga kiritdi.
Ikkinchi o‘yinda O‘zbekiston mezbon Armaniston bilan to‘qnash keldi. Asosiy vaqt 2:2 hisobida yakunlandi, biroq bulitlar seriyasida omad armanlarga kulib boqdi — yakunda 2:3 hisobida mag‘lubiyat qayd etildi, shunga qaramay asosiy vaqtdagi durang evaziga o‘zbekistonlik xokkeychilar 1 ochkoga ega chiqdi.
Uchinchi turda O‘zbekiston Eronga qarshi maydonga tushdi va bu safar juda katta ustunlikni namoyish etdi. Uchrashuv 20:0 hisobida yakunlandi — bu hozircha jamoaning eng yirik hisobdagi g‘alabasi bo‘lib turibdi. O‘zbekiston muz ustida xokkey federatsiyasining ma’lum qilishicha, bu jamoa tarixidagi ilk “quruq” g‘alaba hisoblanadi.
Ta’kidlash joiz, o‘zbekistonliklar Eron darvozasi tomon naq 87 ta zarba yo‘llashdi. Pavel Sinyavskiy hamda Vadim Kravchenko raqib darvozabonini 4 martadan ranjitdi. Vasiliy Jilov 14 ochko bilan (2 gol va 12 assist) musobaqada eng samarali o‘yinchilar reytingida ikkinchi o‘rinni egallab turibdi.
Shu kungacha bo‘lgan natijalarga ko‘ra, O‘zbekiston 3 ta o‘yinda 2 ta g‘alaba va 1 ta mag‘lubiyat bilan turnir jadvalining 1-pog‘onasini egallab turibdi.
Ma’lumot uchun, O‘zbekiston III B divizioniga yo‘l olishi uchun yaxshi imkoniyatga ega bo‘lib turibdi. Sababi turnir favoriti hisoblangan Armaniston 3-turda Kuvaytga overtaymda 4:5 hisobida mag‘lub bo‘lib, o‘z imkoniyatlarini pasaytirib yubordi. O‘zbekiston yuqori divizionga chiqish uchun oldindagi ikki bahsning asosiy vaqtlarida g‘alaba qozonishi talab etiladi.
Eslatib o‘tamiz, O‘zbekiston 17-aprel kuni Indoneziyaga qarshi muzga tushsa, 19-aprel kuni Malayziyani sinovdan o‘tkazadi.
Izoh (0)