Арманистоннинг Ереван шаҳрида ўтаётган хоккей бўйича катталар ўртасидаги Жаҳон чемпионати IV дивизионида Ўзбекистон терма жамоаси 3 та ўйин ўтказиб, 2 ғалаба ва бир мағлубият қайд этди ҳамда турнир жадвалида етакчи бўлиб олди.
Мусобақанинг биринчи турида ўзбекистонлик хоккейчилар Кувайт термасига қарши баҳс олиб боришди. Учрашувда Ўзбекистон тўлиқ устунликка эга бўлиб, 13:3 ҳисобида йирик ғалабани қўлга киритди.
Иккинчи ўйинда Ўзбекистон мезбон Арманистон билан тўқнаш келди. Асосий вақт 2:2 ҳисобида якунланди, бироқ булитлар сериясида омад арманларга кулиб боқди — якунда 2:3 ҳисобида мағлубият қайд этилди, шунга қарамай асосий вақтдаги дуранг эвазига ўзбекистонлик хоккейчилар 1 очкога эга чиқди.
Учинчи турда Ўзбекистон Эронга қарши майдонга тушди ва бу сафар жуда катта устунликни намойиш этди. Учрашув 20:0 ҳисобида якунланди — бу ҳозирча жамоанинг энг йирик ҳисобдаги ғалабаси бўлиб турибди. Ўзбекистон муз устида хоккей федерациясининг маълум қилишича, бу жамоа тарихидаги илк “қуруқ” ғалаба ҳисобланади.
Таъкидлаш жоиз, ўзбекистонликлар Эрон дарвозаси томон нақ 87 та зарба йўллашди. Павел Синявский ҳамда Вадим Кравченко рақиб дарвозабонини 4 мартадан ранжитди. Василий Жилов 14 очко билан (2 гол ва 12 ассист) мусобақада энг самарали ўйинчилар рейтингида иккинчи ўринни эгаллаб турибди.
Шу кунгача бўлган натижаларга кўра, Ўзбекистон 3 та ўйинда 2 та ғалаба ва 1 та мағлубият билан турнир жадвалининг 1-поғонасини эгаллаб турибди.
Маълумот учун, Ўзбекистон III Б дивизионига йўл олиши учун яхши имкониятга эга бўлиб турибди. Сабаби турнир фаворити ҳисобланган Арманистон 3-турда Кувайтга овертаймда 4:5 ҳисобида мағлуб бўлиб, ўз имкониятларини пасайтириб юборди. Ўзбекистон юқори дивизионга чиқиш учун олдиндаги икки баҳснинг асосий вақтларида ғалаба қозониши талаб этилади.
Эслатиб ўтамиз, Ўзбекистон 17 апрель куни Индонезияга қарши музга тушса, 19 апрель куни Малайзияни синовдан ўтказади.
Изоҳ (0)