2022-yil 24-fevraldan so‘ng Rossiyani tark etib, Ukraina armiyasini moliyalashtirgan, shuningdek, “xorijiy agent” yoki “nojo‘ya tashkilot” sifatida ro‘yxatga olingan xalqaro kompaniyalar Rossiya bozoriga qaytish huquqidan mahrum bo‘lishi mumkin.
Ma’lum qilinishicha, mazkur tashabbus ortida Vladimir Putinning o‘zi turibdi. Avvalroq Rossiya prezidenti hukumat rasmiylariga G‘arb kompaniyalarining mamlakatga qaytishi uchun sharoit yaratishni, biroq mahalliy kompaniyalarga ustuvorlik berishni buyurgan edi.
Rossiyaning RBC (RosBiznesKonsalting) agentligiga ko‘ra, hujjatning yakuniy versiyasi hali rasman tasdiqlanmagan. Biroq dastlabki versiyada Rossiya bozoriga qaytmoqchi bo‘layotgan xalqaro kompaniya uchun quyidagi talablar mavjud:
- dushmanona pozitsiyaga ega bo‘lmaslik;
- Ukraina qurolli kuchlarini moliyalashtirmaslik ;
- “nojo‘ya tashkilot” yoki “xorijiy agent” ro‘yxatida bo‘lmaslik.
Bundan tashqari, Rossiyani tark etishdan oldin ishchilari oldidagi majburiyatlarini bajarmagan, maosh yoki soliq to‘lovlarini amalga oshirmagan kompaniyalar ham qaytish huquqidan mahrum etilishi mumkin.
RBC agentligining yozishicha, xalqaro kompaniyalarga ishlab chiqarishni mahalliylashtirish, texnologiyalarni Rossiyaga o‘tkazish hamda ilmiy va muhandislik markazlarini mamlakat hududida ochish kabi majburiyatlar ham yuklanishi mumkin.
Rus armiyasining Ukrainaga keng ko‘lamli bosqinidan beri yuzlab g‘arb kompaniyalari Rossiya bozoridan chiqib ketgan. Kiyevdagi Iqtisodiy maktab institutining ma’lumotlariga ko‘ra, 472 ta kompaniya mamlakatni to‘liq tark etgan, yana 1 360 tasi esa faoliyat doirasini toraytirgan.
Mazkur choralar AQSH va Rossiya o‘rtasidagi munosabatlar iliqlashayotgan, urushni yakunlash bo‘yicha muzokaralar olib borilayotgan bir paytda muhokama qilinmoqda.
Izoh (0)