Ozoda Nursaidovaning “Dilbarim” klipi syomkasida mashina urib ketgan aktrisa Sabrina Jabborova ommaning nazarida ekanligi hech kimga sir emas. Uning murojaatida rejissyor sifatida tilga olingan Shuhrat Mavlonov “Daryo”ga bergan intervyusida voqea qanday ro‘y bergani va voyaga yetmagan qizni kim mashina ruliga o‘tqizgani haqida gapirdi.
— Shuncha kun andisha qildim, ammo bu menga qimmatga tushdi. Ahad Qayumga bir necha marta ommaga rostini aytgin, dedim. Ammo u indamadi va sayohatga ketdi. Shu bois hammasini o‘zim aytishga qaror qildim.
Suratga olish maydonchasida avariya bo‘lgani rost, ammo baʼzi tuhmatlar ham bo‘ldi. Tarqalgan maʼlumotlarda meni klip rejissyori deb yozishibdi, ammo men u klipda operator vazifasini bajarganman. Qaysi aktrisa suratga tushadi va epizodlarni kimlar ijro etishi menga nomaʼlum bo‘lgan. Vazifam jarayonni suratga olib berish bo‘lgan. Klip rejissyori Doniyor Rajabov bo‘lgan, ikki kun o‘zi syomkaga keldi, ammo uchinchi kun to‘yi bo‘lganligi uchun qatnasholmadi. “Siz bo‘lmasangiz ish ko‘ngildagidek bo‘lmaydi”, desam yordamchisi borib, ssenariyni o‘qib turishini aytdi. Aynan shu kuni avariya bilan bog‘liq fojia yuz berdi, deydi Shuhrat Mavlonov.
Ozoda Nursaidova bosh rol ijro etishining mashina boshqarishi bilan bog‘liq sahna ssenariyda bo‘lmagani haqida gapirgandi. Shuhrat Mavlonov esa bu gapni inkor etdi.
— Balki ssenariy o‘zgargandir, ammo bundan xabarim yo‘q. Bilganim, u epizodni menga yordamchi rejissyor o‘qib bergan. Suratga olish ishlari boshlanishidan avval biz maslahatlashib turganimizda Ahad Qayum mashina rulida bo‘lgan aktrisa Sevinch Maʼrufovna bilan instagram uchun videolar oldi. Qiz mashinani boshqardi. Buni mendan tashqari, boshqalar ham ko‘rdi. Suratga olish ishlari boshlaganidan keyin qizning mashina haydolmasligini bildim va “yashirib olamiz, qiz mashinani haydamay, undan tushib kelsa ham bo‘ladi”, dedim. Ammo Ahad qiz bemalol mashina hayday olishini va u bilan viloyatlarga borganda ham boshqarganini aytdi. Gapiga ishonib, mashinaning institut hududiga kirib kelish sahnasini 10 tadan ko‘p dubl oldik. Ammo fojia sodir bo‘lganidan keyin Ahad uning voyaga yetmagani aytyapti. Nima qilishimni bilmay qoldim, Ahad menga “havotir olmang hammasi yaxshi bo‘ladi. Men rulda edim, deyman”, dedi. Xullas, hammasi bir necha soniyada sodir bo‘ldi. Sevinch nega rulni boshqarolmaganini ham, Sabrina nega mashina oldida paydo bo‘lib qolganini ham tushunmay qoldik, deydi Shuhrat Mavlonov.
Shuhrat Mavlonov jabrlanuvchi Sabrina Jabborovaning mashina urib yuborgandan keyingi holatini quyidagicha esladi.
— Men kamerani boshqa rakursga qo‘yib, tasvirga olayotgandim. Baqir-chaqir boshlandi va ortimga o‘girilsam, bir yigit dod solayotgandi. Men uni mashina urib yuboribdi deb tushunibman. Sabrina yerda yotardi, oldiga bordim va hozir tez yordam kelishini aytdim. U oyoqlari og‘riyotganini aytib yig‘lardi. Birinchi yordam ko‘rsatildi, undan keyin kasalxonaga olib ketishdi. Olti soatlik operatsiya davomida suratga olish ishlari to‘xtatilib turdi. Operatsiyadan chiqqanini eshitgandan keyin qolgan kichik epizodni suratga oldik. Murojaatda aytilganidek, u eʼtiborsiz qolib ketgani va ko‘p qon yo‘qotgani yo‘q, deydi Shuhrat Mavlonov.
Shuhrat Mavlonov odamlarning gap-so‘zlari og‘ir botgani va emotsiyada jabrlanuvchi haqidagi gapirgan gaplaridan afsuslanishi haqida gapirdi.
— Bu ishda Ozoda Nursaidovaning aybi yo‘q. U haqiqatan suratga olish maydonchasiga kelmagandi. 20 yillik faoliyatim davomida men ham bunday vaziyatga ilk marta tushdim. Sabrinaga ham qiyin, hech qachon unga oson tutmayman. Uni imkon boricha qo‘llab-quvvatlashga harakat qildik. Shaxsan men o‘zim uch marta kasalxonaga ko‘rgani bordim, miriqib suhbatlashdim. Ko‘ngli ochiq qiz ekan. Ammo orada qo‘ng‘iroq qilganimda onasi qattiq jerkib berdi, shunday keyin qayta telefon qilmadim.
Murojaat tarqalgan paytda meni rejissyor va “Gazni bos” deb mashina boshqargan qizga buyruq bergan shaxs sifatida ko‘rsatishgandan keyin qattiq ranjidim. Emotsiyaga berilib, men ham videomurojaatda ishtirok etibman. Hozir shulardan afsuslanaman.
Tergovchilar ishni o‘rganishayotganda, o‘sha hududdagi kuzatuv kameralarini ham nazardan chetda qoldirmasliklarini so‘rayman. Bundan tashqari, o‘sha yerda bo‘lgan hammani so‘roq qilishlarini istayman, deydi Shuhrat Mavlonov.
Videoni to‘liq holda YouTubedagi “Daryo lifestayle” kanalida tomosha qilishingiz mumkin.
Izoh (0)