Tojikistonning sobiq tashqi ishlar vaziri Hamroxon Zarifiy 27 yilga ozodlikdan mahrum etildi. Mamlakat Oliy sudi davlat to‘ntarishiga urinish ishi bo‘yicha hukm chiqardi. Bu haqda Ozodlik radiosining Tojikiston xizmati xabar berdi.
Mahkumlar orasida sobiq amaldorlar, siyosatchilar va jurnalist bor. Mamlakat Tashqi ishlar vazirligining Axborot, matbuot, tashqi siyosatni tahlil qilish va rejalashtirish boshqarmasi sobiq boshlig‘i Abdulfayz Atoiy 17 yilga. Tojikiston Oliy kengashi sobiq raisi Akbarsho Iskandarov esa 18 yilga qamaldi.
Tojikiston Demokratik partiyasining sobiq rahbari, parlamentning sobiq deputati Saidjafar Usmonzoda 27 yilga, mazkur partiya raisining sobiq o‘rinbosari Ahmadshoh Komilzoda, Tojikiston Sotsial-demokratik partiyasi rahbarining birinchi o‘rinbosari Shokirjon Hakimov va Tojikiston Milliy xavfsizlik davlat qo‘mitasining iste’fodagi polkovnigi Nuramin G‘anizoda 18 yilga ozodlikdan mahrum etildi.
Jurnalistga chiqarilgan hukm
Bundan tashqari, Tojikiston Oliy sudi jurnalist Ruxshona Hakimova — Shokirjon Hakimovning jiyaniga davlatga xiyonat ishi bo‘yicha sakkiz yil ozodlikdan mahrum qilish jazosini tayinladi. Unga qanday ayblov qo‘yilgani aniq emas, chunki bu ishning materiallari sir tutilgan.
Ozodlik radiosi ma’lumotiga ko‘ra, Hakimovaning jinoiy ta’qib qilinishiga uning Xitoyning Tojikistonga ta’siri haqidagi maqolasi sabab bo‘lgan bo‘lishi mumkin.
Tojikistonda sobiq amaldorlar va siyosatchilarning qamoqqa olinishi 2024-yilning yozida, davlat to‘ntarishiga urinish bo‘yicha sud jarayoni esa noyabr oyida boshlandi. Majlislar tergov hibsxonasi hududida yopiq tarzda o‘tkazilmoqda. Sudlanuvchilarning himoyachilari sir saqlash to‘g‘risidagi tilxat tufayli matbuot bilan suhbatlashishdan bosh tortmoqda.
Izoh (0)