Тожикистоннинг собиқ ташқи ишлар вазири Ҳамрохон Зарифий 27 йилга озодликдан маҳрум этилди. Мамлакат Олий суди давлат тўнтаришига уриниш иши бўйича ҳукм чиқарди. Бу ҳақда Озодлик радиосининг Тожикистон хизмати хабар берди.
Маҳкумлар орасида собиқ амалдорлар, сиёсатчилар ва журналист бор. Мамлакат Ташқи ишлар вазирлигининг Ахборот, матбуот, ташқи сиёсатни таҳлил қилиш ва режалаштириш бошқармаси собиқ бошлиғи Абдулфайз Атоий 17 йилга. Тожикистон Олий кенгаши собиқ раиси Акбаршо Искандаров эса 18 йилга қамалди.
Тожикистон Демократик партиясининг собиқ раҳбари, парламентнинг собиқ депутати Саиджафар Усмонзода 27 йилга, мазкур партия раисининг собиқ ўринбосари Аҳмадшоҳ Комилзода, Тожикистон Социал-демократик партияси раҳбарининг биринчи ўринбосари Шокиржон Ҳакимов ва Тожикистон Миллий хавфсизлик давлат қўмитасининг истеъфодаги полковниги Нурамин Ғанизода 18 йилга озодликдан маҳрум этилди.
Журналистга чиқарилган ҳукм
Бундан ташқари, Тожикистон Олий суди журналист Рухшона Ҳакимова — Шокиржон Ҳакимовнинг жиянига давлатга хиёнат иши бўйича саккиз йил озодликдан маҳрум қилиш жазосини тайинлади. Унга қандай айблов қўйилгани аниқ эмас, чунки бу ишнинг материаллари сир тутилган.
Озодлик радиоси маълумотига кўра, Ҳакимованинг жиноий таъқиб қилинишига унинг Хитойнинг Тожикистонга таъсири ҳақидаги мақоласи сабаб бўлган бўлиши мумкин.
Тожикистонда собиқ амалдорлар ва сиёсатчиларнинг қамоққа олиниши 2024 йилнинг ёзида, давлат тўнтаришига уриниш бўйича суд жараёни эса ноябрь ойида бошланди. Мажлислар тергов ҳибсхонаси ҳудудида ёпиқ тарзда ўтказилмоқда. Судланувчиларнинг ҳимоячилари сир сақлаш тўғрисидаги тилхат туфайли матбуот билан суҳбатлашишдан бош тортмоқда.
Изоҳ (0)