AQSHning Jorjiya shtati fuqarosi Vinsent Barrell it janglarini uyushtirgani va hayvonlarga nisbatan shafqatsiz munosabati uchun 475 yillik qamoq jazosiga hukm etildi, deya xabar bermoqda NBC News.
Hayvonlarga qarshi jinoyatlar bo‘yicha davlat prokurori Jessika Rokning ta’kidlashicha, bu it urishtirish bilan bog‘liq eng uzoq muddatli jazodir.
Barrell ustidan ish 2022-yilda qo‘zg‘atilgan. O‘shanda yetkazib berish xizmati xodimi politsiyaga Atlanta yaqinidagi uylardan birining hududida bir nechta it zanjirband qilib saqlanayotganini ma’lum qilgan. Shundan so‘ng, politsiya xodimlari tintuv o‘tkazib, mazkur hududdan 107 ta pitbul zotli itni topishgan. Prokuratura ma’lumotiga ko‘ra, ba’zi itlar ozg‘in holatda bo‘lgan.
Barrell tintuv kuni hibsga olingan. Politsiya pitbullarni it janglariga jo‘natilganini tasdiqlovchi dalillarni topgan. Barcha itlar hayvonlarga yordam ko‘rsatuvchi jamg‘armaga topshirilgan. Veterinarlar ayrim itlarda jang tufayli paydo bo‘lgan chandiqlar borligini va tishlarining bir qismi olib tashlangani haqida xulosa berishgan.
AQSH Oliy sudi sud maslahatchilari qaroriga asoslanib, Barrellni 475 yilga ozodlikdan mahrum etishga hukm qildi. Ayblanuvchi 93 ta it urishtirish va 10 ta hayvonga nisbatan shafqatsizlik qilish holatlari bo‘yicha aybdor deb topildi.
Izoh (0)