АҚШнинг Жоржия штати фуқароси Винсент Баррелл ит жангларини уюштиргани ва ҳайвонларга нисбатан шафқатсиз муносабати учун 475 йиллик қамоқ жазосига ҳукм этилди, дея хабар бермоқда NBC News.
Ҳайвонларга қарши жиноятлар бўйича давлат прокурори Жессика Рокнинг таъкидлашича, бу ит уриштириш билан боғлиқ энг узоқ муддатли жазодир.
Баррелл устидан иш 2022 йилда қўзғатилган. Ўшанда етказиб бериш хизмати ходими полицияга Атланта яқинидаги уйлардан бирининг ҳудудида бир нечта ит занжирбанд қилиб сақланаётганини маълум қилган. Шундан сўнг, полиция ходимлари тинтув ўтказиб, мазкур ҳудуддан 107 та питбул зотли итни топишган. Прокуратура маълумотига кўра, баъзи итлар озғин ҳолатда бўлган.
Баррелл тинтув куни ҳибсга олинган. Полиция питбулларни ит жангларига жўнатилганини тасдиқловчи далилларни топган. Барча итлар ҳайвонларга ёрдам кўрсатувчи жамғармага топширилган. Ветеринарлар айрим итларда жанг туфайли пайдо бўлган чандиқлар борлигини ва тишларининг бир қисми олиб ташлангани ҳақида хулоса беришган.
АҚШ Олий суди суд маслаҳатчилари қарорига асосланиб, Барреллни 475 йилга озодликдан маҳрум этишга ҳукм қилди. Айбланувчи 93 та ит уриштириш ва 10 та ҳайвонга нисбатан шафқатсизлик қилиш ҳолатлари бўйича айбдор деб топилди.
Изоҳ (0)