2024-yil 28-dekabrda “Telekommunikatsiyalar to‘g‘risida”gi qonun kuchga kirdi.
Qonun bilan telekommunikatsiyalar sohasida yagona davlat siyosati amalga oshirilishini ta’minlash maqsadida Vazirlar Mahkamasining ushbu sohadagi vakolatlari belgilab berildi.
Jahon savdo tashkilotiga kirish va a’zolik shartlariga muvofiq, telekommunikatsiya bozorida regulyator (tartibga soluvchi organ) har qanday asosiy telekommunikatsiya xizmatlarini yetkazib beruvchilardan mustaqil bo‘lib, uning qarorlari barcha ishtirokchilar uchun teng va majburiy bo‘ldi.
Qonunning 11-moddasiga asosan, ushbu sohani tartibga solishga mas’ul bo‘lgan, shuningdek, moliyaviy, tuzilmaviy va qaror qabul qilishda mustaqil yuridik shaxslar tartibga soluvchi organ (regulyator) sifatida faoliyat yuritishi mumkinligi belgilab qo‘yildi.
Qonun bilan tartibga soluvchi organga yuridik shaxslarning telekommunikatsiyalar sohasidagi faoliyatini litsenziyalash, ruxsat berish tartib-taomillarini amalga oshirish vakolati berildi.
Shu bilan birga, mazkur organlar tabiiy va texnogen xususiyatli favqulodda vaziyatlarda yoki favqulodda holatda telekommunikatsiya infratuzilmalarini belgilangan tartibda cheklash yoki to‘xtatib turishga haqli.
Telekommunikatsiyalar tarmoqlarini va telekommunikatsiyalar inshootlarini qurish uchun loyiha-smeta hujjatlarining ekspertizasini o‘tkazuvchi yuridik shaxslarni akkreditatsiya qiladi.
Telekommunikatsiyalar tarmoqlarini raqamlash tizimini ishlab chiqadi va rejasini amalga oshirib foydalanuvchilarning huquqlari va qonuniy manfaatlarini himoya qiladi.
Internet jahon axborot tarmog‘i milliy segmentining manzil maydonidan foydalanish tartibini ishlab chiqish va tasdiqlash, ko‘rsatilayotgan telekommunikatsiya xizmatlarining me’yorlarga muvofiqligi yuzasidan monitoringni amalga oshirish kabi vakolatlar ham shular jumlasidan.
Shuningdek, tartibga soluvchi organning o‘z vakolatlari doirasida qabul qilgan normativ-huquqiy hujjatlari talablari barcha yuridik va jismoniy shaxslar tomonidan bajarilishi majburiy etib belgilab qo‘yildi.
Qonunga kiritilgan o‘zgartirishlar BMTning axborot-kommunikatsiya texnologiyalari sohasidagi ixtisoslashgan muassasasi bo‘lgan Xalqaro elektraloqa ittifoqi (ITU)ning ko‘rsatkich va talablariga, shuningdek, AQSH, Janubiy Koreya, Fransiya, Xitoy, Yaponiya kabi sohada rivojlangan davlatlarning tajribalariga asosan amalga oshirildi.
Qonun telekommunikatsiya infratuzilmasidan samarali foydalanish imkoniyatini yaratadi hamda Jahon savdo tashkilotiga a’zo bo‘lish ishlarida ham muhim ahamiyat kasb etadi.
Izoh (0)