Shavkat Mirziyoyev ikki muqaddas masjid xodimi — Saudiya Arabistoni podshohi Salmon bin Abdulaziz Ol Saudning taklifiga binoan 11-noyabr kuni amaliy tashrif bilan ushbu mamlakatga jo‘nab ketdi, deb xabar bermoqda Prezident matbuot xizmati.
Tashrif dasturiga muvofiq, davlat rahbari Ar-Riyod shahrida G‘azo va Livandagi vaziyatning keskinlashuvi hamda Yaqin Sharqdagi mojaroga tez fursatda yechim topish choralarini ishlab chiqishga bag‘ishlangan navbatdan tashqari Arab-islom sammitida ishtirok etadi va nutq so‘zlaydi.
12—13-noyabr kunlari O‘zbekiston yetakchisi Ozarbayjon prezidenti Ilhom Aliyevning taklifiga ko‘ra BMTning Iqlim o‘zgarishi bo‘yicha hadli konvensiyasi tomonlari konferensiyasining 29-sessiyasi (COP29) tadbirlarida ham qatnashadi.
Shavkat Mirziyoyev 2023-yil 3-oktyabr kuni Ostonada bo‘lib o‘tgan Turkiy davlatlar tashkiloti sammitida Falastin—Isroil muammosining yagona va eng adolatli yechimini aytgandi.
“Mazkur muammoning yagona va eng adolatli yechimi — nizoni “ikki xalq uchun ikki davlat” tamoyili asosida hal etishdir”, degan edi prezident.
Davlat rahbarining ta’kidlashicha, Falastin xalqi BMT rezolyutsiyalarida belgilanganidek, mustaqil davlat barpo etish huquqiga ega.
Shavkat Mirziyoyev 2024-yil 6-noyabr kuni Turkiy davlatlar tashkiloti davlat rahbarlari kengashi majlisida so‘zlagan nutqida ham Yaqin Sharqdagi nizoga to‘xtalib o‘tgandi.
“Mazkur ko‘p yillik nizoning yagona yechimi xalqaro me’yoriy hujjatlar va rezolyutsiyalarga muvofiq, 1967-yildagi chegaralar asosida, poytaxti Sharqiy Quddus bo‘lgan mustaqil Falastin davlatini tuzishdir”, degan edi prezident.
Davlat rahbari G‘azo sektori va Livandagi misli ko‘rilmagan gumanitar fojiani, tinch aholiga qarshi vayronkor hujumlarni, ayniqsa, begunoh bolalar, keksalar va ayollar qurbon bo‘layotganini hech narsa bilan oqlab bo‘lmasligini ta’kidladi. Birlashgan Millatlar Tashkilotining Falastin qochoqlariga yordam berish bo‘yicha maxsus agentligi faoliyatini cheklashga qaratilgan harakatlarni ham keskin qoraladi.
Izoh (0)