Jomboy tumanida joylashgan oilaviy shifokorlik punkti ichimlik suvi tarmog‘idan o‘zboshimchalik bilan foydalanayotgani aniqlangan. Bu haqda Qurilish va uy-joy kommunal xo‘jaligi vazirligi axborot xizmati ma’lum qildi.
Aytilishicha, Qurilish va uy-joy kommunal xo‘jaligi sohasida hududiy nazorat qilish inspeksiyasi va “Samarqand suv ta’minoti” AJ xodimlari hamkorlikda suv tarmog‘iga o‘zboshimchalik bilan ulanish holatlarini aniqlash bo‘yicha Jomboy tumanida reyd tadbiri o‘tkazilgan.
Tumanning “Xolvoyi” MFY hududida joylashgan “Chalaqo‘rg‘on” oilaviy shifokorlik punkti ichimlik suvi tarmog‘idan o‘zboshimchalik bilan foydalanayotgani hamda suv hisoblagich uskunasi ro‘yxatdan o‘tkazilmagani va muhrlanmaganligi aniqlandi.
Qo‘shimcha qilinishicha, ushbu qoidabuzarlik yuzasidan tashkilot mas’ullariga ma’muriy bayonnomalar rasmiylashtirilib, holatlar inspeksiya xodimlari tomonidan joyida bartaraf etilmoqda.
Qonunchilikka ko‘ra, ichimlik suvi ta’minoti va oqova suvlarni chiqarib yuborish sohasidagi yetkazilgan zararning o‘rni O‘zbekiston Respublikasi “Ichimlik suvi ta’minoti va oqova suvlarni chiqarib yuborish to‘g‘risida”gi qonuniga asosan qoplanadi.
Izoh (0)