Ijtimoiy tarmoqlarda Chorvoq suv ombori qurib qolgani haqida video tarqaldi. Holat yuzasidan “O‘zbekgidroenergo” aksiyadorlik jamiyati axborot xizmati “Daryo”ga izoh berdi.
Aytilishicha, “O‘zbekgidroenergo” AJ tarkibidagi Chorvoq suv ombori Respublikadagi eng yirik suv ombori hisoblanib, uning suv yig‘ish hajmi 2,06 milliard kub metrni tashkil etadi.
“Chorvoq suv ombori mavsumiy boshqariladigan suv ombori hisoblanadi. Uning dengiz sathiga nisbatan minimal 835 metr sathga tushishi fevral oyining oxiri—mart oyining boshlariga to‘g‘ri kelsa, maksimal 890 metr sathgacha suv yig‘ilishi iyul oyining birinchi yarmiga to‘g‘ri keladi. Ya’ni, mart oyidan iyul oyigacha bo‘lgan davrda suv omborida suv yig‘iladi, iyul oyidan fevral oyigacha esa suv ombori suvi sekin-asta bo‘shatib boriladi.
Joriy yilning 5-aprel holatiga, suv omborining suv sathi 845,8 metrni va suv hajmi esa 625 million kub metrni tashkil etmoqda.
Bugungi kunda Chorvoq suv omborining qurib qolgani bo‘yicha ijtimoiy tarmoqlarda tarqalgan xabarlarning barchasi asossiz hamda noo‘rin hisoblanadi. Sababi, yuqorida ta’kidlanganidek, ushbu holat Chorvoq suv ombori uchun hozirgi mavsumdagi odatiy tabiiy holat”, — deyiladi jamiyat axborotida.
Qo‘shimcha qilinishicha, joriy yil Chorvoq suv omboriga quyiladigan asosiy Chotqol va Pskom daryo havzalarining baland tog‘liklarida qor zaxirasi yaxshi shakllandi hamda bahor-yoz mavsumida qorlar erishi natijasida suv omborida suv zaxirasining yetarli darajada shakllanishiga va kuz mavsumiga suv sathining barqaror holda kirishiga olib keladi.
Izoh (0)