Ўзбекистон ва АҚШ ўртасида фойдали қазилмалар бўйича ҳамкорликни мустаҳкамлаш мақсадида муҳим хом ашё соҳасида (CRM) ўзаро англашув меморандуми имзоланди. Бу ҳақда Тоғ-кон саноати ва геология вазирлиги матбуот хизмати хабар берди.
Ҳужжатни 16 сентябрь куни вазирнинг биринчи ўринбосари Омонулло Насритдинходжаев ва АҚШнинг Ўзбекистондаги элчиси Жонатан Ҳеник имзолади.
Хабарда айтилишича, 2023 йил сентябрьда Ню-Ёрк шаҳрида юқори даражада бўлиб ўтган саммитда давлатлар раҳбарлари фойдали қазилмалар бўйича мулоқотни бошлаш ниятида эканлигини эълон қилганди. Мазкур меморандум АҚШ ва Ўзбекистоннинг ўша саъй-ҳаракатларни илгари суриш, иқтисодий ҳамкорликни мустаҳкамлаш йўлидаги дастлабки одимларидан бири бўлди.
Келишувдан кўзланган мақсад мамлакатлар ўртасида муҳим хом ашё соҳасидаги ҳамкорлик алоқаларини янада мустаҳкамлаш, бошқа йўналишлардаги алоқаларни ҳам ривожлантиришдан иборат.
Ушбу ҳужжат муҳим хом ашё соҳасида АҚШ—Ўзбекистон мулоқотининг давом этишига, геология қидирув, қазиб олиш ва юқори қийматли маҳсулот занжирини яратиш йўлида муҳим қадам бўлиб хизмат қилади.
Шавкат Мирзиёев май ойида геология соҳасидаги вазифаларга бағишлаб ўтказилган йиғилишда муҳим хом ашё — литий, графит, индий, ванадий, ренийнинг янги конларини ўзлаштириш муҳимлигини таъкидлаганди. Президент апрель ойида Европа Иттифоқи билан муҳим хом ашё соҳасида стратегик ҳамкорлик ўрнатилганини, АҚШ ва Буюк Британия билан ҳам шундай битим устида иш олиб борилаётганини айтганди.
Изоҳ (0)