9-sentyabr kuni “Ohangaronsement”da ochiq eshiklar kuni tashkil etildi, deya xabar berdi “Daryo” muxbiri. Tadbirda korxona mijozlari sement ishlab chiqarish jarayonlari bilan tanishtirilgan.
2022-yildan beri “Ohangaronsement” mahsulotlari Rossiyaning “Akkermann sement” brendi ostida sotilmoqda. Toshkent viloyatida joylashgan zavod yiliga 2,4 million tonna sement ishlab chiqaradi.
O‘zbekistonning turli hududlaridan kelgan mehmonlar dastlab korxonada ishga tushirilgan yangi liniya bilan tanishtirildi. Liniyada har biri 40 kiloli 44 ta qop (jami 1760 kilo) sement ikki qavatli qalin plyonkaga o‘raladi. Bu mahsulotni turli havo sharoitlarida saqlash imkonini beradi.
Ikkinchidan, o‘ramdagi qoplar qo‘lda bittalab emas, maxsus texnikalar yordamida tashiladi. Bunda birdaniga salkam ikki tonna sementni transportga ortish mumkin bo‘ladi.
“Yangi liniya qoplardagi sementlardan soatiga 100 ta o‘ram hosil qiladi. Bu degani soatiga 176 tonna sement shunday to‘plamlarda chiqadi”, dedi “Ohangaronsement”ning Texnik savdoni qo‘llab-quvvatlash xizmati rahbari Ibrohim Mamatov.
Avval zavodda sement 50 kiloli qoplarga qadoqlangan. Yog‘ingarchilik sharoitida qopga namlik tushib, mahsulot sifati buzilishi mumkin edi. Shu sababli bunday vaziyatda qoplarni transportga ortish qiyin bo‘lgan. Bunig ustiga mijozlar usti yopiq transport qidirgan. Yangi liniyadan chiqayotgan qadoqlar esa mijozlarga qo‘shimcha qulaylik beradi. Endi transport ham, yog‘inlardan xavotirlanib pana joy izlash ham shart emas.
Albatta, tadbirkor sotib olayotgan mahsuloti qanday ishlab chiqarilishiga qiziqadi. Shuning uchun bo‘lsa kerak zavodga tashrif buyurgan mijozlarda tadbir katta taassurot qoldirdi.
Tadbirkor Ulug‘bek Isomiddinov “Daryo” muxbiri bilan suhbatda korxona sementlari sifatiga yuqori baho berdi.
“Men Farg‘ona viloyatida 28 yildan beri sement savdosi bilan shug‘ullanaman. Aytishim kerak, “Akkermann sement” mahsulotlarining sifati aʼlo darajada. Biz bu brenddan oyiga 3–4 ming tonna sement sotib olamiz”,deydi ishtirokchi.
Yana bir tadbirkor Asatilla Nig‘matillayev “Ohangaronsement” bilan 8 yildan beri hamkorlik qilishini aytdi.
“Zavod Akkermann’ga o‘tgandan keyin sement sifatida yanada yaxshilandi. Biz Toshkent shahrida oyiga 70–80 tonna sement sotamiz. Albatta, buning ichida boshqa brenddagi sementlar ham bor. Ammo O‘zbekistonda ishlab chiqarilgan sementlardan Akkermanniki ko‘p sotiladi. Chunki bu brend mahsulotlariga talab yuqori”, dedi mehmon.
Korxonaning ishlab chiqarish bo‘yicha boshliq o‘rinbosari Ulug‘bek Umaraliyev mijoz gapini tasdiqlab, zavodga yangi boshqaruv tizimi kirib kelgach, ikki yil ichida sement sifati 80 foizga yaxshilanganini aytdi.
“Akkermann ishlab chiqarish siyosati har bir mijoz uchun individual yondoshadi”, dedi mutaxassis.
Navbatdagi manzil zavodning ishlab chiqarish bo‘yicha boshqaruv pulti tomonga bo‘ldi. Mehmonlarga operatorlar sement ishlab chiqarish jarayoni qanday boshqarilishi to‘g‘risida maʼlumot berdi. Shu bilan birga, mijozlar “Sifat nazorati” bo‘limida bo‘lib, sementni xomashyodan tortib tayyor mahsulot bo‘lgunga qadar sifati qanday nazorat qilinishi bilan tanishdi.
Hozirda “Ohangaronsement” korxonasida to‘rtta markadagi sement ishlab chiqarilmoqda. Ular:
- Sem I 52,5;
- Sem I 42,5;
- Sem II/B–K 32,5;
- Sem II/A–K 42,5.
Eng yuqori mustahkamlikka ega bo‘lgan Sem I 52,5 H sementi 600 markali hisoblanadi. Mazkur mahsulot zavodda 2022-yil kuzda ishlab chiqarila boshlangan. Sem I 52,5 H sementiga mahalliy va xorijiy bozorlarda talab ortib bormoqda. Korxona mas’ullarining aytishlaricha, hozirda mahsulot Qozog‘istonga eksport qilinyapti. Kelajakda eksport geografiyasi kengayib boradi.
Tadbirning yakuniy qismida korxona vakillari mehmonlar bilan bir piyola choy ustida suhbat qurdi. “Ohangaronsement” bosh direktori Vitaliy Ilin ishtirokchilarga korxona strategiyasi va oldindagi rejalar to‘g‘risida maʼlumot berdi. Tadbirkorlar tomonidan ham ishlab chiqarish va mahsulot yetkazib berish borasida takliflar bildirildi.
Reklama huquqi asosida.
Izoh (0)