9 сентябрь куни “Оҳангаронцемент”да очиқ эшиклар куни ташкил этилди, дея хабар берди “Дарё” мухбири. Тадбирда корхона мижозлари цемент ишлаб чиқариш жараёнлари билан таништирилган.
2022 йилдан бери “Оҳангаронцемент” маҳсулотлари Россиянинг “Akkermann цемент” бренди остида сотилмоқда. Тошкент вилоятида жойлашган завод йилига 2,4 миллион тонна цемент ишлаб чиқаради.
Ўзбекистоннинг турли ҳудудларидан келган меҳмонлар дастлаб корхонада ишга туширилган янги линия билан таништирилди. Линияда ҳар бири 40 килоли 44 та қоп (жами 1760 кило) цемент икки қаватли қалин плёнкага ўралади. Бу маҳсулотни турли ҳаво шароитларида сақлаш имконини беради.
Иккинчидан, ўрамдаги қоплар қўлда битталаб эмас, махсус техникалар ёрдамида ташилади. Бунда бирданига салкам икки тонна цементни транспортга ортиш мумкин бўлади.
“Янги линия қоплардаги цементлардан соатига 100 та ўрам ҳосил қилади. Бу дегани соатига 176 тонна цемент шундай тўпламларда чиқади”, деди “Оҳангаронцемент”нинг Техник савдони қўллаб-қувватлаш хизмати раҳбари Иброҳим Маматов.
Аввал заводда цемент 50 килоли қопларга қадоқланган. Ёғингарчилик шароитида қопга намлик тушиб, маҳсулот сифати бузилиши мумкин эди. Шу сабабли бундай вазиятда қопларни транспортга ортиш қийин бўлган. Буниг устига мижозлар усти ёпиқ транспорт қидирган. Янги линиядан чиқаётган қадоқлар эса мижозларга қўшимча қулайлик беради. Энди транспорт ҳам, ёғинлардан хавотирланиб пана жой излаш ҳам шарт эмас.
Албатта, тадбиркор сотиб олаётган маҳсулоти қандай ишлаб чиқарилишига қизиқади. Шунинг учун бўлса керак заводга ташриф буюрган мижозларда тадбир катта таассурот қолдирди.
Тадбиркор Улуғбек Исомиддинов “Дарё” мухбири билан суҳбатда корхона цементлари сифатига юқори баҳо берди.
“Мен Фарғона вилоятида 28 йилдан бери цемент савдоси билан шуғулланаман. Айтишим керак, “Akkermann цемент” маҳсулотларининг сифати аъло даражада. Биз бу бренддан ойига 3–4 минг тонна цемент сотиб оламиз”,дейди иштирокчи.
Яна бир тадбиркор Асатилла Ниғматиллаев “Оҳангаронцемент” билан 8 йилдан бери ҳамкорлик қилишини айтди.
“Завод Аккерманнъга ўтгандан кейин цемент сифатида янада яхшиланди. Биз Тошкент шаҳрида ойига 70–80 тонна цемент сотамиз. Албатта, бунинг ичида бошқа бренддаги цементлар ҳам бор. Аммо Ўзбекистонда ишлаб чиқарилган цементлардан Аккерманники кўп сотилади. Чунки бу бренд маҳсулотларига талаб юқори”, деди меҳмон.
Корхонанинг ишлаб чиқариш бўйича бошлиқ ўринбосари Улуғбек Умаралиев мижоз гапини тасдиқлаб, заводга янги бошқарув тизими кириб келгач, икки йил ичида цемент сифати 80 фоизга яхшиланганини айтди.
“Аккерманн ишлаб чиқариш сиёсати ҳар бир мижоз учун индивидуал ёндошади”, деди мутахассис.
Навбатдаги манзил заводнинг ишлаб чиқариш бўйича бошқарув пульти томонга бўлди. Меҳмонларга операторлар цемент ишлаб чиқариш жараёни қандай бошқарилиши тўғрисида маълумот берди. Шу билан бирга, мижозлар “Сифат назорати” бўлимида бўлиб, цементни хом ашёдан тортиб тайёр маҳсулот бўлгунга қадар сифати қандай назорат қилиниши билан танишди.
Ҳозирда “Оҳангаронцемент” корхонасида тўртта маркадаги цемент ишлаб чиқарилмоқда. Улар:
- Сем I 52,5;
- Сем I 42,5;
- Сем II/Б–К 32,5;
- Сем II/А–К 42,5.
Энг юқори мустаҳкамликка эга бўлган Сем I 52,5 Ҳ цементи 600 маркали ҳисобланади. Мазкур маҳсулот заводда 2022 йил кузда ишлаб чиқарила бошланган. Сем I 52,5 Ҳ цементига маҳаллий ва хорижий бозорларда талаб ортиб бормоқда. Корхона масъулларининг айтишларича, ҳозирда маҳсулот Қозоғистонга экспорт қилиняпти. Келажакда экспорт географияси кенгайиб боради.
Тадбирнинг якуний қисмида корхона вакиллари меҳмонлар билан бир пиёла чой устида суҳбат қурди. “Оҳангаронцемент” бош директори Виталий Илин иштирокчиларга корхона стратегияси ва олдиндаги режалар тўғрисида маълумот берди. Тадбиркорлар томонидан ҳам ишлаб чиқариш ва маҳсулот етказиб бериш борасида таклифлар билдирилди.
Реклама ҳуқуқи асосида.
Изоҳ (0)