O‘zbekiston Mudofaa vazirligi jamoasi Koreyada o‘tkazilgan xalqaro musobaqaning mutlaq g‘olibiga aylandi. Bu haqda vazirlik axborot xizmati xabar berdi.
Unga ko‘ra, Koreyaning Kongvando provinsiyasi Inje shahrida ikkinchi marta Xalqaro ilmiy-jangovar tayyorgarlik musobaqasi tashkil qilindi. Unda jami 13 ta jamoa, jumladan, AQSH, Avstraliya, O‘zbekiston va Kambodja davlatlaridan 500 dan ortiq harbiy xizmatchi ishtirok etdi.
Ochilish marosimiga raislik qilgan Koreya Qurolli Kuchlar Bosh shtab boshlig‘i Pak An-So: “Mazkur bellashuv harbiy hamkorlikni mustahkamlash uchun qimmatli poydevorga aylanadi”, deya fikr bildirdi.
Musobaqada har bir jamoa tasodifiy qur’a tashlash orqali bellashuvga kirishdi. Har bir jamoa operativ rejani ishlab chiqish va milliy kelishuv bo‘yicha majburiyatlarni bajarish, bu orqali bo‘linmalarning qo‘shma operatsiyalari uchun zarur bo‘ladigan ko‘nikma va tajriba oshirishga muvaffaq bo‘ldi.
Baholash jarayoni ishtirokchi guruhlar shartlar to‘liq bajarilgani, “omon qolish” darajasi, jangovar harakatlar qoidalariga rioya qilingani, jangovar harakatlar taktik vaziyatga mos kelishini har tomonlama tahlil qilish natijalarini xabardor qilish orqali o‘tkazildi.
O‘zbekiston Mudofaa vazirligi jamoasi mazkur Xalqaro ilmiy-jangovar tayyorgarlik musobaqasida ikkinchi bor ham ishtirok etib, eng yuqori natijani qayd etdi. O‘tgan yilgi ham o‘zbekistonlik harbiylardan iborat jamoa peshqadamlikni qo‘ldan boy bermagan edi.
Avvalroq O‘zbekiston DXX harbiy poligonida 5-sentyabr kuni MDH aksilterror markazi ko‘magida hamdo‘stlik vakolatli organlarining “Sharq-Aksilterror – 2024” qo‘shma aksilterror mashqlari o‘tkazilgan edi.
Izoh (0)