O‘FA prezidenti milliy jamoa futbolchilari bilan uchrashdi

Jahon chempionati uchinchi saralash bosqichi oldidan O‘FA prezidenti Abdusalom Azizov milliy jamoa bilan uchrashdi.

5-sentyabr kuni 2026-yili bo‘lib o‘tadigan Jahon chempionatining uchinchi saralash bosqichi start oladi. 3-sentyabr kuni O‘zbekiston futbol assotsiatsiyasi prezidenti Abdusalom Azizov mas‘uliyatli o‘yinlar oldidan milliy terma jamoa aʼzolari bilan uchrashdi va ushbu bosqich ahamiyati, o‘zbek xalqining azaliy orzusi bo‘lmish Mundial yo‘llanmasini qo‘lga kiritish orqali muxlislarni xursand qilish muhimligi haqida to‘xtaldi. Bosh murabbiy Srechko Katanesning oldindagi rejalari tinglandi.

O‘zbekiston futbol assotsiatsiyasi rahbari shuningdek, futbolchilar bilan suhbatda ijobiy natijalarga erishish uchun O‘FA tomonidan barcha zarur sharoitlar taqdim etilishini maʼlum qilgan.

“O‘z o‘rnida jamoaning bir qator yetakchi futbolchilari o‘z fikrlarini bildirib o‘tgan. Tibbiy shtab va jamoaga aloqador barcha mutaxassislarga tegishli ko‘rsatmalar berildi. Abdusalom Abdumavlonovich bo‘lajak uchrashuvlarda jamoamizga omad tiladi”, deyiladi O‘FA matbuot xizmati xabarida.

Ma’lumot uchun, O‘zbekiston milliy jamoasi 5-sentyabr kuni KXDR bilan o‘ynaydi. Uchrashuv “Bunyodkor” stadionida bo‘lib o‘tadi.