Farg‘ona viloyati Dang‘ara tumanida o‘z xizmat vazifasini bajarayotgan xodim fuqaro tomonidan pichoq bilan hujum qilinishi natijasida vafot etdi. Bu haqda viloyat IIB xabar berdi.
Unga ko‘ra, 26-avgust kuni soat 20:45 larda Dang‘ara tumani IIB profilaktika katta inspektori N.M. o‘z vakolati doirasida Jinoyat kodeksining 276-moddasi 1-qismi bilan muqaddam sudlanib, soat 18:00 dan soat 06:00 ga qadar yashash joyini tark etmaslik taqiqi bilan ozodlikni cheklash jazosini o‘tayotgan tumanning “Shodlik” mahallasida yashovchi fuqaro X.E.ni yashash xonadoniga borib, tekshirgan.
Biroq fuqaro xonadonida yo‘qligini, jazoni o‘tash tartibini buzganini aniqlagan. Shu vaqtda fuqaro mast holda yashash xonadoniga tashqaridan kelib, baqir-chaqir qilib, janjal ko‘targan. Xonadonda bo‘lgan oshxona pichog‘ini olib, kutilmaganda xodimning ko‘krak qafasiga sanchib, unga og‘ir tan jarohati yetkazgan hamda voqea joyidan yashiringan.
Profilaktika inspektori ko‘rsatilgan tibbiy yordamga qaramasdan, shifoxonada vafot etgan.
Olib borilgan tezkor tadbirlar natijasida fuqaro qo‘lga olindi. Unga nisbatan Jinoyat kodeksining 97-moddasi 2-qismi bilan jinoyat ishi qo‘zg‘atilib, qamoqqa olish tarzidagi ehtiyot chorasi qo‘llanildi.
Izoh (0)