O‘zbekistonda bankdan kredit olgan fuqarolar xorijga chiqishiga cheklov qo‘yilganmi? Markaziy bankning Jamoatchilik bilan aloqalar va kommunikatsion siyosat departamenti direktori Аkmal Nazarov bu haqda ma’lumot berdi.
![](/static/2024/08/25/photo_2024-05-23_09-57-36-WWj0vUgT.jpg)
Uning bildirishicha, qoidaga ko‘ra, bank va fuqaro o‘rtasidagi munosabatlarning barchasi fuqarolik huquqiy shartnoma hisoblangan kredit shartnomasi bilan tartibga solinadi. Bank bilan fuqaro o‘rtasidagi shartnomada fuqaroning xorijiy davlatga chiqishiga cheklov o‘rnatadigan hech bir qoida yo‘q. Bo‘lgan taqdirda ham noqonuniy hisoblanadi.
“Chunki O‘zbekiston Respublikasi Konstitutsiyasining 32-moddasiga asosan har kim O‘zbekistondan tashqariga erkin chiqish huquqiga ega. Bu degani kredit shartnomasi sizning xorijga chiqishingizni cheklashi Konstitutsiya qoidalariga zid hisoblanadi” deydi direktori Аkmal Nazarov.
Shu bilan birga ba’zi hollarda, xususan, fuqaro qarzlarini vaqtida to‘lamagan va ishi MIBga chiqqan taqdirda qarzdorning xorijga chiqishi cheklanishi mumkinligini qayd etdi.
Sud hujjatlari va boshqa organlar hujjatlarini ijro etish to‘g‘risidagi qonunga asosan, sud hujjati asosida berilgan ijro hujjati yoki ijro hujjati bo‘lgan sud hujjatidagi talablar belgilangan muddatda qarzdor shaxs tomonidan uzrsiz sababga ko‘ra ijro etilmaganda davlat ijrochisi undiruvchining arizasiga ko‘ra yoki o‘z tashabbusi bilan qarzdor jismoniy shaxsning O‘zbekistondan chiqishi vaqtincha cheklash to‘g‘risida qaror chiqarishga haqli.
“Istisno hollar bo‘lmasa, bankdan kredit olgan fuqaroning xorijga chiqish huquqi cheklanmaydi” deb ta’kidladi Markaziy bank vakili.
Faqat sud organlarining qarori bilangina fuqaroning xorijga chiqishiga cheklov qo‘yilishi mumkin.
Izoh (0)