Jangovar filmlari tufayli mashhur bo‘lgan amerikalik aktyor va prodyuser Tom Kruz Gollivud ramziy belgisiga chiqishga ruhsat berilgan birinchi aktyor bo‘ldi. Bu haqda “Europa Plus” xabar berdi.
Parijdagi Olimpiya o‘yinlarining yopilish marosimida aktyor Tom Kruz “Uddalab bo‘lmas topshiriq” filmi uslubida xavfli tryukni amalga oshirdi. 62 yoshli aktyor Olimpiya bayrog‘ini ko‘targan holda Stade de France tomidan arena maydoniga sakrab chiqdi. Voqeaning davomi ekranlarda aks etdi.
Shundan so‘ng Tom mototsikliga o‘tirib, bayroq bilan samolyotda Atlantika okeani orqali Los Anjelesga qarab uchgani tasvirlandi. Chunki 2028-yilda navbatdagi Yozgi Olimpiya o‘yinlari aynan o‘sha yerda — Kaliforniyaning eng gavjum va mashhur shahrida bo‘lib o‘tadi.
Kruz parashyut bilan samolyotdan sakrab, Kaliforniya tepaliklarida joylashgan mashhur Gollivud belgisi yoniga qo‘ndi. U yerda Olimpiya o‘yinlari timsoli bo‘lgan halqalar ham o‘rnatilgan edi. Ma’lum bo‘lishicha, Tom Gollivud yozuviga tegishga rasman ruxsat berilgan birinchi aktyor bo‘ldi. Ushbu ma’lumotni Hollywood Sign Trust rahbari Jeff Zarrinnam tasdiqladi:
“Odatda bu yerda suratga olish jarayoni tugagach, Gollivud belgisiga tegish va uning atrofida yurish taqiqlanadi. Bu holat birinchi marta sodir bo‘ldi. Tom va uning jamoasi aynan shu yozuv bilan bog‘liq esda qolarli video suratga olishni istadi, chunki u Los Anjelesning ramziy belgisi hisoblanadi”.
Video 2023-yilda yashirincha suratga olingan va ishchilar maxfiylikni saqlash uchun hattoki xavfsizlik kameralarini o‘chirib qo‘ygan.
Izoh (0)