“Vampir bilan intervyu”, “Uddalab bo‘lmas topshiriq” va “Top Gan” jangovar filmlari tufayli mashhur bo‘lgan amerikalik aktyor va prodyuser Tom Kruz 3-iyul kuni 62 yoshni qarshi oldi. O‘zining yoshiga nisbatan ancha yosh va baquvvat ko‘rinadigan aktyor buning siri jiddiy parhez, qat’iy intizom va muntazam sport bilan shug‘ullanishda ekanini aytib o‘tdi.
Kruz makrobiotik parhezga amal qiladi va taomnomasidan zararli konservantlar va kimyoviy qo‘shimchalari bo‘lgan oziq-ovqatlarni chiqarib tashlagan. Uning kundalik menyusi sabzavotlar, mevalar, baliq va yong‘oqlar iste’moliga asoslangan. Aktyor deyarli spirtli ichimliklarni iste’mol qilmaydi va bug‘da pishirilgan taomlarni afzal ko‘radi.
Tom Kruz iste’mol qilinadigan kaloriya miqdorini doim nazorat qiladi va kunlik me’yor 1200 kilokaloriyadan oshmasligiga e’tibor beradi. Ushbu rejimga rioya qilish uchun aktyor shaxsiy oshpaz xizmatidan foydalanadi. Qat’iy parhezdan tashqari aktyor sportga katta e’tibor beradi. U har kuni tonggi soat 5:00 dan boshlab mashq qiladi va jismoniy faol hayot tarzini olib boradi.
Ma’lumot uchun: Tom Kruz Nyu Yorkda muhandis va o‘qituvchi oilasida tug‘ilgan. U aktyorlikka ilk qadamlarini 10 yoshida maktab teatr klubida qo‘ygan. U “Vampir bilan intervyu”, “Uddalab bo‘lmas topshiriq”, “Top Gan” jangovar filmlari, “Magnoliya”, “Vanilrang osmon”, “So‘nggi samuray” dramalari va boshqa ko‘plab filmlarda unutilmas obrazlarni gavdalantirdi. Uzoq yillik faoliyati davomida u “Oskar”ga nomzod va “Oltin globus” g‘olibi sifatida bir nechta mukofotlarga sazovor bo‘ldi.
Izoh (0)