Жанговар фильмлари туфайли машҳур бўлган америкалик актёр ва продюсер Том Круз Голливуд рамзий белгисига чиқишга руҳсат берилган биринчи актёр бўлди. Бу ҳақда “Europa Plus” хабар берди.
Париждаги Олимпия ўйинларининг ёпилиш маросимида актёр Том Круз “Уддалаб бўлмас топшириқ” фильми услубида хавфли трюкни амалга оширди. 62 ёшли актёр Олимпия байроғини кўтарган ҳолда Stade de France томидан арена майдонига сакраб чиқди. Воқеанинг давоми экранларда акс этди.
Шундан сўнг Том мототциклига ўтириб, байроқ билан самолётда Атлантика океани орқали Лос Анжелесга қараб учгани тасвирланди. Чунки 2028 йилда навбатдаги Ёзги Олимпия ўйинлари айнан ўша ерда — Калифорниянинг энг гавжум ва машҳур шаҳрида бўлиб ўтади.
Круз парашют билан самолётдан сакраб, Калифорния тепаликларида жойлашган машҳур Голливуд белгиси ёнига қўнди. У ерда Олимпия ўйинлари тимсоли бўлган ҳалқалар ҳам ўрнатилган эди. Маълум бўлишича, Том Голливуд ёзувига тегишга расман рухсат берилган биринчи актёр бўлди. Ушбу маълумотни Hollywood Sign Trust раҳбари Жефф Зарриннам тасдиқлади:
“Одатда бу ерда суратга олиш жараёни тугагач, Голливуд белгисига тегиш ва унинг атрофида юриш тақиқланади. Бу ҳолат биринчи марта содир бўлди. Том ва унинг жамоаси айнан шу ёзув билан боғлиқ эсда қоларли видео суратга олишни истади, чунки у Лос Анжелеснинг рамзий белгиси ҳисобланади”.
Видео 2023 йилда яширинча суратга олинган ва ишчилар махфийликни сақлаш учун ҳаттоки хавфсизлик камераларини ўчириб қўйган.
Изоҳ (0)