O‘zbekistonda yo‘l haqini to‘lashning avtomatlashtirilgan tizimi operatori ATTO va Bishkek jamoat transporti tizim operatori o‘rtasida 19-avgust kuni hamkorlik memorandumi imzolandi. Bu haqda ATTO matbuot xizmati va Bishkek meriyasi xabar berdi.
Memorandumdan maqsad ikki davlat shaharlaridagi jamoat transportida to‘lovlarni o‘zaro qabul qilish imkoniyatidir.
“Tez orada Qirg‘iziston fuqarolari O‘zbekiston shaharlari bo‘ylab sayohat haqini “Tulpar” kartalari bilan, O‘zbekiston fuqarolari esa Bishkekda ATTO kartalari orqali to‘lashlari mumkin bo‘ladi. Faol rivojlanayotgan turizm sharoitida bunday hamkorlik ikki mamlakat aholisining sayohatlarini yanada qulay qiladi”, deyiladi ATTO matbuot xizmati xabarida.
Bishkek meriyasi xabarida aytilishicha, ushbu hamkorlik transport tizimlarini integratsiyalashuvini tezlashtiradi.
Ayni paytda tizimlararo integratsiya ishlari olib borilmoqda.
“Tulpar” — Qirg‘izistonning Bishkek shahar jamoat transportida avtomatlashtirilgan to‘lov tizimi operatoridir.
Izoh (0)