Shavkat Mirziyoyev tadbirkorlar bilan to‘rtinchi ochiq muloqotdagi nutqida eng ko‘p tilga olgan so‘zlar “tadbirkor”, “korxona”, “xizmat”, “eksport”, “bozor”, “yer”, “bank”, “mahsulot”, “biznes”, “loyiha”, “hudud” va “tizim” bo‘ldi. Iqtisodiy tadqiqotlar va islohotlar markazi mutaxassislari prezidentning tadbirkorlar bilan muloqoti chog‘ida nutqini lingvistik tahlil qildi.
Tahlil natijalariga ko‘ra, tadbirkorlarning eng dolzarb muammolari biznes to‘siqlarni qisqartirish va infratuzilma, yer, energiya bilan taʼminlash ekanligi ma’lum bo‘ldi.
Shavkat Mirziyoyev o‘z nutqida jami 4 912 so‘zdan foydalangan. Xususan, “tadbirkor” so‘zi 103 marta, “korxona” 47 marta, “yer” 41 marta, “xizmat” 28 marta, “eksport” 26 marta, “bozor” 25 marta, “bank” 23 marta, “mahsulot” va “biznes” 20 marta, “loyiha” 19 marta, “hudud” va unga tegishli so‘zlar 18 marta tilga olingan.
Ushbu so‘zlar muhokama qilinayotgan masalalarning dolzarbligini va iqtisodiy o‘sishni rag‘batlantirish va ishbilarmonlik muhitini yaxshilash maqsadida ularni hal qilishda kompleks yondashuv zarurligini taʼkidlaydi.
Bir qator asosiy iboralarga alohida eʼtibor qaratildi. Ikki so‘zdan tashkil topgan iboralardan “ishlab chiqarish” iborasi 8 marta, “qishloq xo‘jaligi” iborasi esa 7 marta tilgan olingan. “Tashqi bozor” va “mikromoliya tashkilotlari” iboralari 6 marta, “ochiq muloqot”, “yirik korxonalar” va “xususiy sektor” iboralari 5 marta aytilgan.
Uch so‘zdan iborat iboralardan “aholi va tadbirkor” iborasi 3 marta, “savdo-sanoat palatasi”, “qishloq xo‘jaligi yerlari”, “sunʼiy intellekt orqali” va “shaffof qurilish tizimi” iboralari 2 marta tilga olingan.
Tadbirkorlar bilan bo‘lgan oxirgi 3 ta ochiq muloqotning lingvistik tahliliga ko‘ra, “korxona”, “xizmat”, “eksport”, “bozor” va “mablag‘” kabi asosiy atamalardan foydalanishda sezilarli o‘sish kuzatilgan. Ayniqsa, bu o‘sish “xizmat ko‘rsatish” sohasida alohida ajralib turadi, bu so‘zning tilga olinish soni 2023-yilga nisbatan 3,5 barobarga, “bozor” so‘zidan foydalanish 2,3 barobar va “eksport” so‘zi 1,7 barobarga oshgan.
Qayd etish lozim, O‘zbekistonda band aholining 52 foizi xizmat ko‘rsatish sohasida mehnat qiladi.
Tahlilda keltirilishicha, prezident nutqida bir qator asosiy yo‘nalishlar va tegishli masalalarga to‘xtalib o‘tildi. Asosiy yo‘nalishlarni taqsimlash va tegishli so‘zlardan foydalanish tahlili shuni ko‘rsatdiki, biznes uchun to‘siqlarni qisqartirish yo‘nalishida “yer”, “tadbirkor”, “biznes”, “bank” va “kredit” so‘zlariga katta e’tibor beriladi. Bu so‘zlar tadbirkorlik uchun qulay muhit yaratish muhimligini ta’kidlaydi va nutqning muhim qismini tashkil qiladi.
“Prezidentning nutqi iqtisodiyotni rivojlantirish va tadbirkorlikni qo‘llab-quvvatlashga strategik yondashuvini ta’kidlaydigan asosiy mavzularga aniq tuzilish va e’tiborni namoyish etadi”, deyiladi tahlilda.
Prezidentning tadbirkorlar bilan ochiq muloqoti haqida
Shavkat Mirziyoyev 2021-yildan boshlab 20-avgustni Tadbirkorlar kuni etib belgilagan va uni har yili keng nishonlashni taklif qilgan. O‘sha yili prezidentning tadbirkorlar bilan o‘tkazgan ilk ochiq muloqotida o‘n mingga yaqin tadbirkor ishtirok etgandi. Shu kungacha barcha uchrashuvlar Toshkent shahrida o‘tkazib kelingan. Prezident tadbirkorlar bilan 2024-yilgi ochiq muloqoti ilk bor Qoraqalpog‘istonda o‘tkazildi. Unda O‘zbekistonning barcha hududlaridan 300 ga yaqin tadbirkor va investorlar to‘plandi. Uchrashuvda tadbirkorlik uchun qo‘shimcha sharoitlar yaratish masalasida qator yangiliklar aytildi.
Izoh (0)