O‘zbekistonda soliq to‘lamaganlik uchun tadbirkorga jinoyat ishi qo‘zg‘atishga asos bo‘ladigan miqdorni ikki baravargacha oshirish taklif qilindi.
Shavkat Mirziyoyev Nukusda tadbirkorlar bilan ochiq muloqotda tadbirkorlik faoliyatini to‘xtatishga asos bo‘ladigan qonunbuzilish holatlari darajasi belgilanmaganini ko‘rsatib o‘tdi. Oqibatda arzimagan kamchiliklar bilan ham tadbirkorlar faoliyatini to‘xtatib qo‘yish holatlari kuzatilmoqda.
Shu bois 1-noyabrga qadar aholining hayoti va sog‘lig‘iga haqiqiy xavf soluvchi mezonlar reyestri ishlab chiqiladi. Prezident reyestrda yo‘q mezon bo‘yicha tadbirkor faoliyatini to‘xtatgan mansabdor javobgarlikka tortilishi haqida ogohlantirdi.
Tadbirkorlarni jinoiy javobgarlikka tortishni yanada liberallashtirish muhimligi ta’kidlandi.
Masalan, soliqlarni to‘lashdan bo‘yin tovlash, degan jinoyat turi bor. Bunda tadbirkor to‘lamagan soliq 100 million so‘mdan oshsa, jinoyatchi bo‘lib qolmoqda. Shu bois soliq to‘lamaganlik uchun tadbirkorga jinoyat ishi qo‘zg‘atishga asos bo‘ladigan miqdorni ikki baravargacha oshirish taklif qilindi.
Prezident tadbirkorlar ushbu berilayotgan yengillikni, bildirilayotgan ishonchni suiiste’mol qilmasligiga umid bildirdi.
Muloqotda qayd etilishicha, kredit oldi-berdisida bank ham, tadbirkor ham tavakkal qiladi, lekin amaliyotda bankning huquq va vakolatlari tadbirkorga nisbatan ancha ko‘proq. Masalan, kredit vaqtida qaytmasa, garovga qo‘yilgan mulk shartnoma tuzilgan paytdagi qiymatida sotuvga chiqariladi.
3-4 yil oldin kredit olinganda 100 million so‘mga baholangan mulkning bugungi narxi 30-40 foiz qimmatlashsa, uni qanday qilib eski qiymatida sotish mumkin, deya savol qo‘ydi prezident.
To‘g‘ri, muammoli kredit bilan qattiq shug‘ullanish kerak, lekin bu tadbirkorni “tugatish” hisobidan bo‘lmasligi zarur, dedi davlat rahbari.
Endilikda garovdagi mulkni savdoga chiqarishdan oldin uning hozirgi bozor qiymati aniqlanadigan, qaytmagan qarzdorlik garov qiymatining 15 foizidan kam bo‘lsa undiruv mulkka qaratilmaydigan tizim yaratiladi. Bank mijoziga qarzni boshqa manba hisobidan qoplashga imkon beradi.
Izoh (0)