O‘zbekiston 2024-yilgi sug‘orish mavsumi yakunigacha Qozog‘istonga yana 500 million kub metr suv yetkazib beradi. Bu haqda Qozog‘iston suv xo‘jaligi va irrigatsiya vazirligi xabar berdi.
Vazirlik bergan ma’lumotga ko‘ra, O‘zbekiston 1-apreldan buyon Sirdaryo orqali Qozog‘istonga 3,9 milliard kub metr suv yetkazib berdi. Tomonlar 6 oy ichida Qozog‘istonga Sirdaryo orqali 3,7 milliard kub metr suv yetkazib berish bo‘yicha kelishuvga erishgan. O‘zbekiston tomoni belgilangan hajmdagi suvni 4 oyda jo‘natib, o‘z majburiyatlarini muddatidan oldin bajardi.
Bu ishlar Qozog‘istonning janubiy viloyatlari fermerlarining ehtiyojlarini qondirish maqsadida amalga oshirilmoqda.
Bugungi kunda Qozog‘istondagi Chordara suv omborini to‘ldirish hajmi 2,6 milliard kub metrni tashkil etayotgan bo‘lib, o‘tgan yilga nisbatan 500 million kub metrga ko‘pdir. Chordara suv omboriga jami 4 milliard kub metr suv quyilgan.
O‘z navbatida Chordara suv omboridan Sirdaryoning quyi oqimiga 4,5 milliard kub metr suv yuborilgan. Bu o‘tgan yilga nisbatan 1 milliard kub metrga ko‘pdir. Qizilqum kanaliga 850 million kub metrdan ortiq, Shimoliy Orol dengiziga 590 million kub metrdan ortiq suv quyilgan.
O‘zbekiston suv xo‘jaligi vazirligi axborot xizmati rahbari Shuhrat Suyunovning “Daryo”ga ma’lum qilishicha, suv yetkazib bo‘yicha davlatlararo kelishuv, daryodan suv olish limitlari bor. Kelishuvga ko‘ra, davlatlar o‘ziga tegishli suvni olishi kerak. O‘zbekistonda 2024-yilda suv tanqis emas. Qozog‘iston o‘z ulushini olmoqda.
Izoh (0)