Қозоғистон ҳукумати сўнгги 2,5 йил давомида умумий қиймати 1 триллион тенгедан ортиқ (2 миллиард 83 миллион АҚШ доллари) бўлган маблағларни мамлакатга қайтарган. Бу ҳақда Kazinform нашри хабар берди.
Қайтарилган маблағлар ҳақида Қозоғистон коррупцияга қарши кураш агентлиги батафсил маълумот берган. Унга кўра, жорий йил бошидан бери мамлакатга жами 195 миллиард тенге ҳажмдаги маблағлар қайтарилган.
Сўнгги 2,5 йил ичида олигархлардан қайтариб олинган давлат мулки ва унинг қиймати умумий 1,09 триллион тенгега баҳоланган. Бу мулкларнинг катта қисми собиқ президент оиласига тегишли бўлган.
Коррупцияга қарши кураш агентлиги айни пайтда Назарбоевнинг жияни Қайрат Сатибалди мулкларини давлат ҳисобига қайтариш операциялари давом этаётганини билдирган. Олдинроқ собиқ президент жияни 1,6 миллиард долларлик активларини давлатга топширишга рози бўлгани хабар қилинган эди.
Қайрат Сатибалдидан қайтариб олинган активлар орасида Олмаотадаги қиймати 7,9 миллиард тенгедан ортиқ бўлган Kaisar Tower бизнес маркази ҳам бор. Ушбу бино Қозоғистон Миллий педагогика қизлар университети ихтиёрига ўтказилган. Бундан ташқари, қиймати 800 миллион тенге атрофидаги яна бир бино Жургенов номидаги Қозоғистон миллий бадиий академияси тасарруфига берилган.
Пойтахтда жойлашган қиймати 5 миллиард тенгедан ортиқ бўлган учта турар жой эса имконияти чекланган болалар учун мўлжалланган Остона шаҳар ҳокимлигининг “Психологик-педагогик тарбиялаш маскани” бирлашмасига топширилган.
Манбада қўшимча қилинишича, сўнгги тадбирлар давомида Қозоғистонга Австрия, Франция, Лихтенштейн, БАА, Туркия, Россия ва бошқа давлатлардан пул, қимматли қоғозлар, кўчмас мулк ва заргарлик буюмлари қайтарилган. Австриядан қайтарилган маблағлар 36,8 миллиард тенгени, Лихтенштейндан олинган маблағлар 116,7 миллиард тенгени, Туркиядан жалб қилинган пуллар 2,2 миллиард тенге ҳамда БААдан мамлакатга қайтарилган маблағлар 6,3 миллиард тенгени ташкил этган.
Бундан ташқари, собиқ саноат ва инфратузилмани ривожлантириш вазири ўринбосари, мансаб ваколатини суиистеъмол қилганликда айбланиб судланган Т.Тўқтабоевга нисбатан ҳам қўшимча иш қўзғатилган. Унга тегишли бўлган Қўстанай вилоятидаги никель ва кобальтнинг катта захиралари давлат тасарруфига олинган. Манбага кўра, Шевченскоедаги никель ва кобальт умумий захираси 5,6 триллион тенгедан кўпроқ.
Изоҳ (0)