AQSHda harbiy sirlarni Xitoy xavfsizlik xizmatlariga sotishda ayblangan askar hibsga olindi. Bu haqda BBC nashri xabar berdi.
Manbada aytilishicha serjant Korbeyn Shults AQSH armiyasi kontrrazvedka xizmati tomonidan o‘tkazilgan maxsus operatsiyada qo‘lga olingan. Ayni paytda u tergov kamerasida ekani maʼlum qilingan.
Qo‘lga olingan serjant mudofaa va xavfsizlik sohasiga aloqador ko‘plab maxfiy maʼlumotlarni Xitoy rasmiylariga uzatgan. Buning evaziga serjantga boshlanishiga 42 ming dollar to‘langan.
Korbeyn Shults Xitoy vakillari bilan 2022-yilning iyun oyida aloqa o‘rnatgan. O‘tgan ikki yil davomida katta hajmli maʼlumotlar almashilgan va sotilgan.
Sud hujjatlariga ko‘ra, o‘ta maxfiy maʼlumotlarga kirish uchun xavfsizlik ruxsatiga ega bo‘lgan serjant Shults Gonkongda yashovchi shaxs bilan muntazam aloqada bo‘lgan. Xavfsizlik xizmatlari eʼtiboriga tushmaslik uchun ikki shaxs kamdan-kam muloqot qilgan, o‘z yozishmalarini yo‘q qilib kelgan.
Gonkongda yashovchi shaxs serjant Shultsdan raketaga qarshi mudofaa va mobil artilleriya tizimlari bilan bog‘liq “nozik maʼlumotlar”ni to‘plashni so‘ragan. Ushbu to‘g‘risidagi maʼlumotlar Xitoyga uzatilgan yoki yo‘qligi hozircha nomaʼlum.
Serjant Shults yashirin missiyasi davomida Rossiyaning Ukrainadagi urushidan olgan bilimlari asosida AQSH qiruvchi samolyotlari, harbiy taktikasi va AQSH armiyasining Tayvanga nisbatan mudofaa strategiyasi haqidagi maʼlumotlarni to‘plagan. Bu maʼlumotlarning bir qismini uzatishga ham ulgurgan.
“Ushbu sudlanuvchi AQSHdan tashqarida yashovchi shaxsga milliy mudofaa maʼlumotlarini uzatish uchun til biriktirib, harbiylarimizning unga bo‘lgan ishonchini oyoqosti qildi. Milliy xavfsizligimizni xavf ostiga qo‘ydi”, deyiladi AQSH rasmiylari bayonotida.
Korbeyn Shults jinoyatini tan olgan. Xavfsizlik xizmati hozirda u bilan aloqa o‘rnatgan xitoylik shaxsni aniqlashga urinayotgani xabar qilingan.
Izoh (0)