Bangladeshning sobiq bosh vaziri Shayx Hasina qotillikda ayblanmoqda. Bu haqda Bangladesh mahalliy nashrlariga tayanib, BBC nashri xabar berdi.
Shayx Hasinaga nisbatan politsiya tomonidan fuqarolik tartibsizliklari paytida bir kishining o‘ldirilishi yuzasidan qotillik bo‘yicha tergov ishi qo‘zg‘atilgan. Fuqarolardan keladigan daʼvolarga qarab tergov ishi yana kengaytirilishi mumkin.
Poytaxt Dakkada bir necha hafta davom etgan qonli tartibsizliklar ortidan avvalgi hukumatda faoliyat yuritgan yana olti nafar yuqori davlat amaldorlarining ham xatti-harakatlari tergov qilinmoqda. Amaldorlarga nisbatan davlat mulkini o‘marish, korrupsiya va fuqarolarga zo‘ravonlik qilish kabi ayblovlar qo‘yilgan.
Shayx Hasina hozirda Hindistonda ekani aytilgan. U o‘ziga qo‘yilgan ayblovlarni keskin rad etgan. Adolatni tiklash uchun sobiq bosh vazirni emas, balki namoyishlarni tashkil etganlarni jazoga tortishni talab qilgan.
Shayx Hasina boshqaruvi ostida qabul qilingan yangi mehnat kvotasi to‘g‘risidagi qonunga eʼtiroz bildirgan talabalar harakatidan boshlangan namoyishlarda 500 nafarga yaqin fuqaro halok bo‘lgan. Ayrim siyosiy arboblarga ko‘ra, politsiya shaxsan bosh vazir topshirig‘i bilan namoyishchilarni o‘qqa tutgan. Bu esa ko‘plab yo‘qotishlarga, noroziliklarning qaytdan alangalanib ketishiga olib kelgan.
Shayx Hasinaga nisbatan birinchi tergov ishi Dakkada yashovchi mahalliy baqqol Abu Said o‘limi yuzasidan qo‘zg‘atilgan. Abu Said noroziliklar paytida boshidan o‘q yeb, halok bo‘lgan. Uning tanishi, tadbirkor Amir Hamza esa fuqaroning o‘limida Shayx Hasinani ayblab, sudga murojaat qilgan.
Sobiq bosh vazirga nisbatan qotillik ayblovi mamlakat ichida keskin tus olishi mumkin. Chunki namoyishlarda halok bo‘lgan fuqarolar ko‘p va aholining katta qismi bunda bevosita Shayx Hasinani ayblaydi.
Shayx Hasina namoyishchilarni millatni beqarorlashtirish uchun kurashayotgan terrorchilar deb atagan. Bu esa uning mamlakatdagi karyerasini tom maʼnoda chippakka chiqargan.
Namoyishlar nisbatan tingan Bangladeshda muvaqqat hukumatga hozirda tinchlik yo‘nalishida Nobel mukofoti sovrindori Muhammad Yunus rahbarlik qilmoqda. U mikroiqtisodiyotni joriy qilish va mamlakatda ijtimoiy sifat darajasini ko‘tarishga vaʼda bergan.
Izoh (0)