AQSH tijorat kompaniyalari O‘zbekiston bozoriga kirishga intilmoqda. Bu haqda AQSH Davlat departamenti matbuot xizmati bergan maʼlumotga asoslanib, “Trend” nashri xabar berdi.
Manbada aytilishicha, AQSH tijorat kompaniyalari yetakchilari O‘zbekiston bilan hamkorlik qilish borasida ko‘p bor Davlat departamentining savdo bo‘limiga murojaat qilgan. Murojaatlardan maqsad esa o‘sib borayotgan bozorga mablag‘ kiritish va manfaatli hamkorlikka erishish bo‘lgan.
“Mahsulotlarimiz ham O‘zbekistonga olib kirish uchun tekshirish va sertifikatlashni talab qiladi, shuning uchun bu jarayonni tezlashtirish AQSh qishloq xo‘jaligi va chorvachilik mahsulotlarini o‘zbekistonlik isteʼmolchilarga yetkazishda yordam beradi. AQSH texnologiyalari, sanoat uskunalari va ishlab chiqarilgan mahsulotlar yetkazib beruvchilari ham davlat xaridlari imkoniyatlari bo‘yicha faol ishtirok etmoqda. O‘zbekistondagi hamkorlar bilan ishlashga qiziqish katta”, deyilgan departament matbuot kotibi xabarida.
Matbuot kotibining so‘zlariga ko‘ra, AQSH O‘zbekistonga eʼlon qilingan islohotlar dasturini amalga oshirishda, jumladan, iqtisodiy masalalarda ham yordam berishga tayyor. Oxirgi iqtisodiy islohotlar sarmoyaviy muhitni sezilarli darajada yaxshilagan va keyingi islohotlar O‘zbekistonga ko‘proq sarmoyaviy va texnikaviy tajriba olib kelishi mumkin.
“Umuman olganda, biz Markaziy Osiyo va Janubiy Kavkaz hukumatlari g‘arbga — Yevropa tomon mintaqaviy aloqalarni qo‘llab-quvvatlash bo‘yicha olib borayotgan ko‘p tomonlama saʼy-harakatlarni olqishlaymiz va rag‘batlantiramiz. Bunday saʼy-harakatlar yanada xavfsiz, barqaror va farovon mintaqani yaratishga yordam beradi”, deyiladi AQSH idorasi bayonotida.
Xabarda aytilishicha, AQSH kompaniyalari O‘zbekistonda infratuzilmaga investitsiya kiritish borasida ham o‘rganishlar olib bormoqda. Tahlillar o‘zini oqlasa strategik loyihalarga qo‘l urilishi bildirilgan.
“Global infratuzilma bo‘yicha hamkorlik orqali AQSH hozirda TransKaspiy xalqaro transport yo‘nalishidagi strategik loyihalarni sezilarli darajada oldinga siljitish uchun loyihalarga texnik yordam ko‘rsatish, loyihalarni tayyorlash va moliyalashtirishga hissa qo‘shishi mumkin bo‘lgan infratuzilma investitsiyalari uchun potensial sohalarni baholamoqda”, deyilgan rasmiy manbada.
Avvalroq O‘zbekiston transport vaziri o‘rinbosari Jasurbek Choriyev Global infratuzilma va investitsiyalar sohasidagi hamkorlik bo‘yicha maxsus koordinator vazifasini bajaruvchi Xelayna Matza bilan TransKaspiy xalqaro transport yo‘nalishini rivojlantirishga qaratilgan infratuzilma loyihalarini moliyalashtirish masalalarini muhokama qilish uchun uchrashuv o‘tkazgan edi. Unda tomonlar jumladan O‘zbekiston hududlarida multimodal logistika markazlari va A toifali omborlarni rivojlantirish, ayrim temiryo‘l vokzallarining sig‘imini oshirish masalalarini ham gaplashib olgan.
Izoh (0)