Qozog‘istonning sobiq prezidenti Nursulton Nazarboyevning jiyani Qayrat Satibaldi 1,6 milliard dollarga baholangan, noqonuniy sotib olingan aktivlarini davlatga qaytarib bergan. Bu haqda “Fergana Agency” nashri xabar berdi.
Qozog‘iston Korrupsiyaga qarshi kurash agentligi sobiq prezident jiyani bilan bog‘liq vaziyat haqida batafsil maʼlumot bergan. Unga ko‘ra, Qayrat Satibaldi 32,8 milliard tenge (1,6 milliard dollar) hajmidagi mulklarini davlat ixtiyoriga topshirgan.
Qaytarilgan aktivlarga maʼmuriy binolar, eksklyuziv zargarlik buyumlari, hashamatli uylar, kvartiralar va avtomobillar, kompaniyalardagi ulushlar va hissalar, temiryo‘llar, shuningdek naqd ko‘rinishdagi pullar mablag‘lari kiradi. Qaytarilgan pul mablag‘lari 661,5 million dollarni tashkil etib, ular Qozog‘istonga Avstriya, Lixtenshteyn, BAA va Turkiyadagi hisob raqamlaridan qaytarilgan.
Qozog‘istonda umumiy qiymati 158 milliard tenge bo‘lgan (330 million dollarga yaqin) 115 ta obyekt davlat mulkiga o‘tkazilgan. Ular orasida 13 tasi kottej, 10 ta bino, 13 ta yer uchastkasi, 4 ta xonadon, 3 ta tijorat uyi, 2 ta madrasa binosi, 2 ta avtoturargoh, 25 ta kompleks, bitta qurilishi tugallanmagan maydon, shuningdek, 29 ta avtomobil va beshta maxsus texnika mavjud.
Qaytarilgan mulkning bir qismi Satibaldining yaqin qarindoshlari, filiallari va nazorat ostidagi kompaniyalari nomiga rasmiylashtirilgan. Ko‘chmas mulk borasidagi o‘rganishlar hali ham davom etayotgani bildirilgan.
Qayrat Satibaldi avtohalokatda halok bo‘lgan Qozog‘istonning birinchi prezidentining ukasi Satibaldi Nazarboyevning o‘g‘li hisoblanadi. U otasining ismini familiyasi sifatida tanlagan. Qayrat “Skyline Investment Company S.A." kompaniyasi orqali Qozog‘iston telekommunikatsiya xizmatlari bozoridagi monopoliyaning deyarli to‘rtdan bir qismiga egalik qilgan. U yillar davomida Milliy xavfsizlik qo‘mitasida ishlagan, siyosat va biznesda faol ishtirok etgan, Qozog‘istonning eng boy odamlaridan biri bo‘lgan.
2022-yil 13-mart kuni tadbirkor korrupsiyaga qarshi kurash xizmati tomonidan mansab vakolatini suiisteʼmol qilish va “Kazaktelekom” pul mablag‘larini o‘ta yirik miqdorda o‘g‘irlashda gumonlanib hibsga olingan edi. Ertasi kuni kompaniyaning kapital ofisida tintuvlar o‘tkazilgan, bir oy o‘tgach esa tadbirkor nazorati ostidagi firmalar “Kazaktelekom” ning 28,8 foiz ulushini davlat tasarrufiga qaytargan.
2022-yil 26-sentyabrda sud Qayrat Satibaldini “Kazaktelekom” AK va “Transport servis markazi” aksiyadorlik jamiyatidagi o‘g‘irlik ishi bo‘yicha olti yilga ozodlikdan mahrum qilgan. Tadbirkorga nisbatan jinoiy daromadlarni legallashtirish va bojxona to‘lovlarini to‘lashdan bo‘yin tovlash ayblari ham tekshirilgan. U o‘z aybiga to‘liq iqror bo‘lib, davlatga yetkazilgan zararni qoplashga vaʼda bergan.
Qayrat Satibaldi hozirda jazoni o‘rtacha tartibli axloq tuzatish muassasasida o‘tamoqda. O‘tgan yilning dekabr oyida u shartli ravishda ozod qilish uchun ariza bergan, ammo sud arizani “mahkumning xatti-harakati shubhali” deya tushuntirish berib, rad etgan.
Izoh (0)