“Дунё садолари” — Jah Khalib, Jony, Инна ва ўзбек эстрадасининг таниқли хонандалари бир саҳнада куйламоқда (фото, видео)

29—31 июль кунлари Андижон вилояти Хонобод шаҳрида “Дунё садолари” II халқаро миллий эстрада санъати фестивали бўлиб ўтмоқда. Шу кунлари мегаюлдузлар Jah Khalib, Jony, Инна ва ўзбек эстрадасининг таниқли хонандалари мусиқий чиқишларини мухлислар эътиборига ҳавола қилади.

Фестивалнинг очилишида маданият вазири Озодбек Назарбеков иштирок этиб, келаси йиллари бу саҳнада чиқишни дунёнинг энг машҳур хонандалари орзу қилиши ва унга кўплаб хорижлик меҳмонлар ҳам ташриф буюриши ҳақида гапирди.

Фестивалнинг илк кунида ўзбек эстрадаси примадоннаси Юлдуз Усмонова ва Ҳамдам Собировлар иштирок этишди.

Қозоғистонлик мегаюлдуз Jah Khalib’нинг чиқиши ҳам мухлисларга манзур бўлди.

“Шаҳарни бир оз айландим, менга ёқди, бу ерда романтик руҳият ва хотиржамликни ҳис этдим”, деди таассуротлари билан бўлишди хонанда Jah Khalib.

Юлдуз Усмонова эса журналистларга берган интервьюсида бир оз танқидий фикрларини айтиб ўтди.

— Эшитаётган мусиқа инсоннинг замонавийлигини белгилаб бермайди. Баъзи инсонлар замонавий эканлиги ҳақида гапириб ўзи тушунмайдиган “гупур-гупур” мусиқасини эшитади. Ўзлигини таниган инсон бўлса, эшитаётган қўшиғининг мазмун-моҳиятини ҳис қилади. Хорижга борсак, бизни ҳам худди шундай кутиб олишади.

“Эстрадамизни ривожлантирмасак, Ғарбники кириб келади дегандингиз. Нима қилишимиз керак?”, деган саволга Юлдуз Усмонова қуйидагича жавоб берди.

— Кеч қолдингиз, мана кириб бўлди. Ҳозирги кунда ёшларнинг нима эшитаётганига қараб санъат келажагини билиб олаверинг. Ўзбек эстрадасини ривожлантириш керак, аммо бунинг учун нима қилиш кераклигини билмайман. Мен ҳам қўлимдан келганча ўз ишимни қиляпман, дейди Юлдуз Усмонова.

Эслатиб ўтамиз, “Дунё садолари” II халқаро миллий эстрада санъати фестивалининг ёпилиш маросими 31 август куни бўлиб ўтади.

Фестивалдан тайёрланган эксклюзив репортажни қуйидаги ҳавола орқали томоша қилишингиз мумкин.