Sibirsev 1-saralash guruhida ishtirok etib, 7:56.67 daqiqada marraga keldi.
Bu natija sportchiga final yo‘llanmasini qo‘lga kiritish uchun kamlik qildi. U umumiy reytingda 31 nafar suzuvchi orasida 22-o‘rinni egalladi. Final yo‘llanmasi esa eng yaxshi natijani qayd etgan 8 nafar sportchiga nasib etdi.
U avvalroq 400 metrga erkin suzish dasturida ham finalga chiqa olmagan edi. Shu tariqa, Ilya O‘zbekiston uchun o‘zining ilk Olimpiadasidagi ishtirokini yakunladi.
Sibirsev Ilya Pavlovich 2001-yil 28-aprel kuni Rossiya Federatsiyasining Altay o‘lkasida tavallud topgan. 2021-yildan O‘zbekiston terma jamoasi aʼzosi. Murabbiyi — Sherzod Inog‘omov. Sportchi AQSHning Kentukki shtatidagi “Louisville” universitetining sport klubida doimiy mashg‘ulotlarni olib boradi. Erkin usulda suzish yo‘nalishiga ixtisoslashgan Ilya Okean ortida o‘tgan turli xalqaro musobaqalarda shohsupadan joy olgan. 200, 400 va 800 metr masofalarga suzish dasturida O‘zbekiston rekordlari sohibi hisoblanadi.
Sibirsev 21-iyun kuni Kanadada o‘tgan xalqaro musobaqada 800 metrga erkin usulda suzish dasturida Olimpiada normativini bajarish orqali Parij—2024 yozgi Olimpiya o‘yinlarida ishtirokchisiga aylandi.
Izoh (0)