O‘zbekistonda Chevrolet Lacetti avtomobili ishlab chiqarish to‘xtatildi. Bu haqda UzAutoMotors xabar berdi.
Qayd etilishicha, Asaka zavodi konveyeridan eng oxirgi — 487 104 chi Chevrolet Lacetti ishlab chiqarildi.
“U tarixda eng oxirgi Lacetti (Gentra) bo‘lib muhrlandi. O‘tgan 10 yil davomida u ko‘plab avtomobil ixlosmandlari uchun ishonchli va qulay bo‘lib, xalq avtomobiliga aylanib ulgurdi”, deyiladi kompaniya xabarida.
Lacetti Asaka zavodida 2013-yildan ishlab chiqarila boshlangan. Avtomobil dastlabki yillarda 11 222 dona ishlab chiqarilgan bo‘lsa, 2023-yilda bu ko‘rsatkich 89 565 donaga yetgan.
2023-yil dekabrda kompaniya 2024-yildan boshlab Lacetti ishlab chiqarishni butunlay to‘xtatishini bildirgandi. Biroq joriy yil may oyida ham Chevrolet Lacetti ishlab chiqarish to‘xtatilmagani maʼlum bo‘lgan.
“Lacetti ishlab chiqarish qachongacha davom etishini aniq ayta olmayman. Bu birdaniga to‘xtamaydi. Yaqin 7 kun ichida xaridorlarga yana shartnoma berilishi yoki berilmasligi oydinlashadi, deya maʼlum qilgan “O‘zavtosanoat” vakili.
UzAutoMotors so‘nggi marta 2024-yil 21-may kuni hech qanday eʼlonsiz 3 600 ta Chevrolet Lacetti avtomobillari uchun shartnomalar tuzgan. Bundan avval esa 8-may kuni (7-mayda eʼlon berilgan) avvalgi avtomobillar xaridi uchun tuzilgan shartnomalardan chiqarilgan hajmdan 4 500 dona Lacetti’ga shartnoma berilgan.
Statistika agentligi xabariga ko‘ra, 2024-yil yanvar–iyun oylarida UzAutoMotors 12 635 dona Gentra ishlab chiqargan.
Izoh (0)