“Ўзбекгидроэнерго” АЖ президент топшириғига кўра, мамлакатга тўғридан тўғри инвестиция маблағларини жалб қилиш, яъни давлат кафолатисиз кредит шартномалар тузиш учун Хитой Халқ Республикасининг Банк оф Чина ва CITIC банклари билан ҳамда Америка қўшма штатларининг халқаро тараққиёт агентлиги USAIDънинг грант маблағларини жалб қилиш учун музокаралар олиб бормоқда. Бу ҳақда “Дарё”га ташкилот ахборот хизмати раҳбари Равшан Бойқулов хабар берди.
Таъкидланишича, “Ўзбекгидроэнерго” АЖ кредит рейтинги Ўзбекистонда ишлаб чиқарувчи ташкилотлар орасида ТОП учликда қолмоқда.
“Ташкилотимиз 2024 йилда ҳам жаҳонда етакчи рейтинг агентликларидан бири ҳисобланган Fitch Ratings халқаро рейтинг агентлигининг “ББ-” барқарор даражадаги халқаро кредит рейтингини сақлаб қолди. Маълумки, жорий йилда берилган рейтинг ўтган йилнинг молиявий таҳлили натижалари, яъни 2023 йилнинг натижалари сарҳисобига берилган баҳо ҳисобланади. Fitch Ratings халқаро рейтинг агентлиги ташкилотимизнинг нафақат молиявий-иқтисодий кўрсаткичлари мустаҳкам ўсиб бораётганига, балки бизнес стратегиясининг самарадорлигига ҳам амин бўлди”, дейди Равшан Бойқулов.
Билдирилишича, жамият кредит рейтингини бир неча йиллардан буён барқарор даражада сақлаб келаётганлиги нафақат унинг инвестисион муҳити жозибадорлиги, қолаверса, бошқарувдаги самарадорлигига ҳам боғлиқ.
“Мазкур даража жамиятни жаҳоннинг машҳур инвесторлар бозорларига аниқ ва равшан бизнес стратегиясига, шаффоф молиявий ҳисоботларига, шунингдек, кучли корпоратив бошқарув тизимига эга биринчи ўзбек ишлаб чиқарувчи корхонаси сифатида танитиб бормоқда. Рейтинг келгусида “Ўзбекгидроэнерго” АЖнинг иқтисодий барқарорлигини янада оширишга хизмат қилади ҳамда инвестиция лойиҳаларини амалга оширишда хорижий кредитларни давлат кафолатисиз тўғридан тўғри жалб қилиш имкониятини беради”, дейди масъул.
Изоҳ (0)