O‘zbekistonda yoqilg‘i-energetika sohasida qonuniylikni ta’minlash maqsadida 2024-yilning 6 oyida qariyb 50 mingta reyd tadbirlari o‘tkazildi. Bu haqda Bosh prokuratura matbuot xizmati xabar berdi.
O‘tkazilgan reyd tadbirlari davomida 48 mingdan ortiq noqonuniy holatlar fosh etilib, 217 milliard so‘m zarar undirilgan.
27-iyul kuni Prezident Administratsiyasining mas’ul xodimi ishtirokida Bosh prokuror o‘rinbosari Shohrux Aminov boshchiligida Yoqilg‘i-energiya resurslaridan foydalanish ustidan davlat nazoratini samarali tashkil etish va muvofiqlashtirish bo‘yicha Respublika shtabining navbatdagi yig‘ilishi o‘tkazilgan bo‘lib, unda davlat rahbari topshirig‘iga ko‘ra yirik iste’molchilarda energiya samaradorligini oshirish hamda noqonuniy ulanish holatlarini bartaraf etish borasida amalga oshirilayotgan ishlar ahvoli muhokama qilinib, kelgusida ishlarni samarali tashkil etish bo‘yicha tegishli chora-tadbirlar belgilab olindi.
Xususan, davlat rahbari tomonidan ko‘rsatib berilgan “Energetika xavfsizligi — davlat xavfsizligi” tamoyili asosida ishlarni tashkil qilib, dastlab energetik balansni shakllantirish, resurslarni tejamkorligiga erishish hamda o‘g‘irlikning oqibati bilan emas, balki oldini olish bilan shug‘ullanish lozimligi qayd etildi.
Shuningdek, sohada qonuniylikni ta’minlanishiga erishmagan, ayniqsa energiya resurslarini talon-toroj qilish holatlarini fosh etish, yetkazilgan zararni undirish va boshqa ustuvor yo‘nalishlarda ishlarni samarasiz tashkil qilgan hududlarning faoliyati tanqid qilinib, mas’ul mansabdor rahbarlari intizomiy javobgarlikka tortilishi haqida rasman ogohlantirildi.
Izoh (0)