O‘zbekistonda havo harorati 2–3 daraja pasayishi kutilmoqda. Iqlimshunos Erkin Abdulahatov bu sezilarli pasayish bo‘lmasligini bildirdi.
“O‘zgidromet” prognoziga ko‘ra, mamlakatda 30—31-iyul kunlari havo harorati biroz pasayadi. Yaʼni ikki kun davomida harorat respublika bo‘ylab 34-39 daraja issiq bo‘ladi.
Erkin Abdulahatov fikricha, bu sezilarli darajadagi pasayish emas.
“30—31-iyul kunlari havo harorati biroz pasayadi. Ammo, bu sezilarli darajada salqinli emas. Hozirgi kunga nisbatan haroratlar 2—3 daraja past bo‘ladi xolos. Masalan, oy so‘nggi kunlarida janub viloyatlarda havo harorati +41 darajagacha (hozir +44 daraja), respublikaning boshqa qismida +39 darajagacha (hozir +41 va +43 daraja) ko‘tariladi”, deb yozgan mutaxassis.
O‘zbekistonda 25-iyuldan beri juda issiq harorat hukmron. Kunduz kunlari aksariyat hududlarda havo harorati +38 darajadan yuqorilamoqda. Kechalari ham harorat 30 darajagacha issiq bo‘lmoqda.
Ayniqsa, bir necha kundan beri Surxondaryo viloyatining Termiz shahrida eng yuqori haroratlar qayd etilmoqda. Masalan, 27-iyul kuni shaharda kuzatuvlar tarixidagi eng issiq harorat rekordi qayta yangilandi. Yaʼni hududdagi havo harorati maksimumi +45 darajaga yetdi.
Agar sutkalik harorat kamida 43 va undan yuqori darajada ketma–ket besh kun kuzatilsa, bu anomal issiq hisoblanadi. Bunday jazirama inson sog‘lig‘i uchun o‘ta xavfli meteorologik hodisa sifatida tasniflanadi.
Erkin Abdulahatov fikricha, joriy yuqori issiqlik to‘liqini respublikaning katta qismida issiqlik anomaliyasini keltirib chiqarmadi.
Avvalroq Gidrometeorologiya ilmiy-tadqiqot instituti O‘zbekistonda iyul va avgust oyi boshlarida anomal issiq havo kuzatilishini prognoz qilgandi.
Institut olimlari tahlilida bunday g‘ayritabiiy harorat taʼsirida mintaqada termik depressiya (termal tushkunlik) vujudga kelishi ham qayd etilgan. Prognozda Markaziy Osiyo tekislik hududlarida havo harorati 44–46 darajagacha, baʼzi hollarda 48 darajagacha issiq bo‘lishi mumkinligi bildirilgan.
Termik depressiyaning davomiyligi 2–3 sutkadan 5–7 sutkagacha, baʼzi yillarda esa 1,5–2 haftagacha davom etishi kutilayotgani taʼkilangan.
Olimlar fikricha, so‘nggi paytlarda termik depressiya kuzatilgan davrda mintaqa mamlakatlarida qishloq xo‘jaligi, iqtisodiyot tarmoqlari hamda energetik tizimda kuchli zo‘riqishlar kuzatilmoqda.
Eslatib o‘tamiz, “O‘zgidromet” 25–29-iyul kunlari O‘zbekiston bo‘ylab juda issiq ob-havo bo‘lishini prognoz qilgan. Besh kun davomida respublika hududining katta qismida (Qoraqalpog‘iston Respublikasi va Xorazm viloyatidan tashqari) havo harorati kunduz kunlari 40–43 darajagacha, janubda va cho‘l hududlarda 44–45 darajagacha ko‘tarilishi qayd etilgan.
Ob-havoning keskin isib ketishi birinchi navbatda bolalar, qariyalar va bemorlarga og‘ir taʼsir qiladi. Hatto sog‘lom odamlar ham baʼzi qoidalarga rioya etishlariga to‘g‘ri keladi. Jazirama yuzaga kelgsa, Sog‘liqni saqlash vazirligi aholiga jazirama issiqdan saqlanish qoidalarini eslatgan.
Vazirlik soat 10:00 dan 17:00 gacha salqin joylarda bo‘lishni, paxta matoli liboslar kiyishni, kuniga 3 litrdan kam bo‘lmagan miqdorda suyuqlik ichishni tavsiya qilgan. Kun davomida iliq dush qabul qilish, vaqti-vaqti bilan badanni sovuq suvda namlangan dastro‘mol bilan artib turish ham tanani haddan ziyod qizib ketishdan saqlashi taʼkidlangan.
Izoh (0)