Vazirlar Mahkamasining qarori bilan aholi uchun elektr energiyasi va tabiiy gaz taʼminoti isteʼmolining bazaviy meʼyorlari tasdiqlandi. Oliy Majlis Qonunchilik palatasi deputati, “Yuksalish” umummilliy harakati raisi Bobur Bekmurodov “tabaqalashtirilgan tariflar” sabab boylar o‘z xarajatlari uchun davlat byudjetidan dotatsiya olmasligi kerakligi haqida yozdi.
Bekmurodovning yozishicha, O‘zbekistonda elektr energiyasi isteʼmoliga to‘lovlar uning tannarxiga mos kelmaydi, oradagi tafovut davlat byudjetidan subsidiyalar hisobiga qoplanadi. Bunday yondashuv fuqarolarning moddiy imkoniyatidan qatʼi nazar, butun aholi uchun qo‘llaniladi.
Energiya resurslarining jiddiy tanqisligi sharoitida moddiy taʼminlangan fuqarolar xarajatlari uchun davlat byudjetidan dotatsiya olmasligi kerak, deb hisoblaymiz, — deydi u.
Energetika vazirligi hisob-kitoblariga ko‘ra, hozir aholining 15 foizi oyiga 300 kVt•soatdan ortiq elektr energiyasini isteʼmol qiladi. 75 foiz aholining isteʼmoli esa 200 kVt•soatdan oshmaydi. O‘zbekistonning energetika tarmog‘i tub islohotlarga muhtoj, shu munosabat bilan tariflarni o‘zgartirish va bozor mexanizmlarini joriy etish zarurligini ta’kidladi Bobur Bekmurodov.
Islohotlar bilan birga, “Yuksalish” harakati masʼul vazirlik va idoralarni quyidagilarni inobatga olishga chaqiradi:
- Qaror ijrosi doirasida markaziy isitish tizimi va tabiiy gazdan foydalanish imkoni yo‘q hududlardagi sharoitlarni hamda asosiy issiqlik manbalari pechka va konditsionerlar ekanligini hisobga olish zarur;
- Energetika vazirligi yuqori kuchlanish bo‘lganda maishiy texnikalariga zarar yetgan isteʼmolchilarga kompensatsiya to‘lash mexanizmlarini ishlab chiqishi zarur;
- Hukumat davlat byudjetidan energiya tarmog‘ini modernizatsiya qilishga ajratilgan mablag‘larning ochiqligi va shaffofligini taʼminlashi kerak;
- Xorijiy tajribani o‘rganish ham muhim. Masalan, differensiyalangan tariflar qo‘llaniladigan mamlakatlarda elektr energiyasiga talab yuqori bo‘lgan paytlarda (anomal havo sharoitlarida) tarif normalari sezilarli darajada oshiriladi.
Eslatib o‘tamiz, 2022-yilgi muhokamalarda elektr energiyasi va tabiiy gaz narxlarini ijtimoiy norma asosida belgilash va oshirish nazarda tutilgandi. Ya’ni yoqilg‘i-energetika resurslari isteʼmoli uchun narxlar yangi tizim asosida o‘zgarishi taklif etilgan. Xususan, aholi uchun 1 kVt•soat elektr energiyasi isteʼmoli oyiga 250 kVt•soatgacha – 325 so‘m, 250 kVt•soatdan yuqori har 1 kVt•soat uchun – 650 so‘m etib belgilanishi aytilgan. Ammo ayrim sabablarga ko‘ra, ushbu rejani amalga oshirish kechiktirilgan.
2023-yil 1-noyabrdan boshlab bir oyda elektr energiyasi o‘rtacha oylik isteʼmoli uchun to‘lov miqdoriga o‘suvchan koeffitsiyent qo‘llanishi boshlangan. Energetika vazirligi mazkur o‘suvchan koeffitsiyent aholi isteʼmolchilarining 98 foiziga mutlaqo taʼsir qilmasligini ma’lum qilgan edi.
Izoh (0)