Ўзбекистонда ёқилғи-энергетика соҳасида қонунийликни таъминлаш мақсадида 2024 йилнинг 6 ойида қарийб 50 мингта рейд тадбирлари ўтказилди. Бу ҳақда Бош прокуратура матбуот хизмати хабар берди.
Ўтказилган рейд тадбирлари давомида 48 мингдан ортиқ ноқонуний ҳолатлар фош этилиб, 217 миллиард сўм зарар ундирилган.
27 июль куни Президент Администрациясининг масъул ходими иштирокида Бош прокурор ўринбосари Шоҳрух Аминов бошчилигида Ёқилғи-энергия ресурсларидан фойдаланиш устидан давлат назоратини самарали ташкил этиш ва мувофиқлаштириш бўйича Республика штабининг навбатдаги йиғилиши ўтказилган бўлиб, унда давлат раҳбари топшириғига кўра йирик истеъмолчиларда энергия самарадорлигини ошириш ҳамда ноқонуний уланиш ҳолатларини бартараф этиш борасида амалга оширилаётган ишлар аҳволи муҳокама қилиниб, келгусида ишларни самарали ташкил этиш бўйича тегишли чора-тадбирлар белгилаб олинди.
Хусусан, давлат раҳбари томонидан кўрсатиб берилган “Энергетика хавфсизлиги — давлат хавфсизлиги” тамойили асосида ишларни ташкил қилиб, дастлаб энергетик балансни шакллантириш, ресурсларни тежамкорлигига эришиш ҳамда ўғирликнинг оқибати билан эмас, балки олдини олиш билан шуғулланиш лозимлиги қайд этилди.
Шунингдек, соҳада қонунийликни таъминланишига эришмаган, айниқса энергия ресурсларини талон-торож қилиш ҳолатларини фош этиш, етказилган зарарни ундириш ва бошқа устувор йўналишларда ишларни самарасиз ташкил қилган ҳудудларнинг фаолияти танқид қилиниб, масъул мансабдор раҳбарлари интизомий жавобгарликка тортилиши ҳақида расман огоҳлантирилди.
Изоҳ (0)